UNTL realiza kolókiu ho tema ‘COVID-19, mídia no komunikasaun sosiál iha Timor-Leste’, ne’ebé realiza iha salaun Liseu, kinta (21/10). Imajen TATOLI/Francisco Sony

DILI, 21 outubru 2021 (TATOLI)–Sentru Estudu Kulturál no Arte (SEKA) iha Universidade Nacional Timor Lorosa’e (UNTL) realiza kolókiu iha loron 21 no 22 outubru ho tema ‘COVID-19, mídia no komunikasaun sosiál iha Timor-Leste’.

Koordenadór SEKA, Vicente Paulino, relata inisiativa ne’e tanba haree ba papél universidade atu halo peskiza, servisu ba komunidade, ensinu no aprezenta eventu kulturál.

“Haree ba papél haat ne’e, SEKA hamutuk ho dosente sira ne’ebé hamahan-an iha UNTL realiza kolókiu atu promove serbisu profesór no estudante hodi dezenvolve rasik. Signifika partisipasaun estudante sira hodi envolve-an iha prosesu peskiza bele haforsa-an hodi fortifika hanoin iha eventu sira,” Koordenadór SEKA hateten iha auditóriu UNTL, kinta ne’e.

Painél dahuluk sei haree kona-ba COVID-19 no papél mídia, painél daruak kona-ba rádiu televizaun no produsaun notísia, painél datoluk kona-ba edukasaun no notísia, painél dahaat eleisaun parlamentár no notísia ikus liu, no painél dalimak ko’alia kona-ba satisfasaun impaktu rede sosiál no telenovela.

SEKA simu testu hosi oradór na’in-sia no sei iha tan testu hosi oradór seluk, hodi halo revizaun no tinan oin bele lansa rezultadu.

Iha fatin hanesan, Vise-Reitór Asuntu Akadémiku no Garantia Kualidade UNTL, Samuel Venâncio Freitas, hateten, atividade ne’e hanesan parte ida hosi misaun universidade, ne’ebé sempre hanorin, peskiza no transfere koñesimentu ba sosiedade.

Tanba ne’e, nia konsidera, kolókiu ne’e importante tebes atu fó espasu ba ema lubuk ida hodi bele ko’alia ba malu, diskute no partilla asuntu ruma.

Seremónia ne’e, ninia dimensaun atu hanesan semináriu ne’ebé ho tema ne’ebé relevante ba situasaun atuál.

“Maski Governu hapara ona medida sira, maibé durante ne’e ita iha hela situasaun COVID-19 nia laran, ita-nia informasaun sira ne’ebé fó sai hosi mídia sira hamosu impaktu diferente ba ema ne’ebé rona,” nia akresenta.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here