Autoridade RAEOA loke konkursu públiku ba merkadu tradisionál Baoknana. Imajen Agência TATOLI/Abílio Elo Nini.

OÉ-CUSSE, 21 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), loke konkursu públiku hodi konstrui merkadu tradisionál Baoknana, aldeia Citrana, suku Bene-Ufe, sub-rejiaun Nítibe.

Sekretáriu Rejionál ba Asuntu Komérsiu no Indústria, Pedro da Silva Boquifai, fó-sai katak tinan ne’e sei halo konstrusaun foun ba merkadu Baoknana ho fasilidade integrada.

“Daudaun ne’e tenderizasaun ona (konkursu públiku), unidade aprovizionamentu públika ona iha kuadru aviza edifísiu ZEESM. Ita espera empreza sira bele kompete, nune’e iha novembru hahú halo ona konstrusaun, atu fasilita negosiante sira fa’an sasán ho dignu,” nia informa ba Agência TATOLI, iha Kiumaria, Oé-Cusse, kinta ne’e.

Ekipa tékniku sira hosi Sekretaria Rejionál ba Asuntu Komérsiu no Indústria, liuhosi departametu komérsiu konsulta ona ho autoridade lokál, lia-na’in no komunidade sira iha área refere.

Rezultadu konsulta ne’e komunidade sira konkorda ona no entrega fatin ne’e sai fatin sentru ba merkadu iha sub-rejiaun Nítibe ne’e.

Iha faze konsulta ne’e, komunidade ho autoridade lokál sira, hato’o sujestaun katak merkadu ne’e estratéjia, tanba merkadu ne’e iha tempu basar akumula komunidade sira hosi suku lima ne’ebé perténsia ba sub-rejiaun Nítibe nian.

“Ita sei halo ho pakote hanesan uma ba negosiante, konstrui fatin ba koordenadór merkadu sira, hari’is-fatin nomoos fatin soe-foer. Montante orsamentu prevee ona hosi Orsamentu Jerál Estadu (OJE) 2021, maibé seidauk fó-sai ba públiku tanba daudaun ne’e, empreza sira submete hela sira dokumentu to’o 26 outubru ne’e,’’ nia fundamenta.

Entretantu, Jestór sub-rejiaun Nítibe, Manuel Tolan, agradese ba autoridade tanba merkadu tradisionál Baoknana, durante ne’e vendedór sira uza de’it ai-mahon hodi fa’an sasán.

“Merkadu ne’e merese duni atu halo konstrusaun, tanba durante ne’e negosiante sira fa’an sasán uza de’it ai-mahon, maibé agora autoridade tau-matan ona nune’e fasilita ita-nia komunidade sira fa’an sasán ho dignu,” nia orgullu.

Purtantu, orsamentu ne’ebé Agência TATOLI asesu hosi livru 3-C (RAEOA-ZEESM) mensiona, Orsamentu Jerál Estadu ba RAEOA iha tinan 2021 ho montante $ 127,000,000. Hosi montante ne’e koloka $30.000,00 ba kontrusaun merkadu Baokana (Detailed Engineering Design, Tender Documents and Evaluation of Bids for Improvement of Baoknana Market). Projetu ne’e tama iha Planu Asaun Anuál RAEOA nian.

Notísia relevante: “Ami Nian Mahon Negósiu Mak Ai-hun”

Jornlaista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here