Selesaun Nasional Timor-Leste U-23. imajen/FFTL

DILI, 21 outubru 2021 (TATOLI)- Selesaun Nasionál Timor Leste U-23, kinta (21/10), ohin, dezloka ba singapura hodi partisipa jogu Play of Asian Football Confederation (AFC) 2022.

Ekipa selesaun Timor -Leste hamutuk jogadór na’in 30 no ekipa Federasaun Futeból Timor – Leste (FFTL) nian na’in hitu hala’o viajen ho aviaun Citilink hosi Dili bá Jakarta-Indonezia, hafoin to’o Singapura iha loron 22 outubru.

Molok dezloka ba Singapura, Prezidente Federasaun -Futeból Timor-Leste (F-FTL), Francisco Martins da Costa Pereira Jerónimo ho jogadór hala’o despedida ho Sekretáriu Estadu Juventude no Desportu (SEJD), Abrão Saldanha.

Biban ne’e, SEJD, Abrão Saldanha, husu ba jogadór atu reprezenta Timor-Leste ho responsabilidade hodi hatudu jogu ne’ebé di’ak, atu manan ka lakon ho dignidade

“Ita boot-sira reprezenta Timor-Leste, Povu Timor no ema hotu hadomi futeból hein hela ita boot-sira nia rezultadu jogu, imi ba reprezenta Bandeira Timor-Leste tenke hatudu buat ne’ebé di’ak ba nasaun no povu. Karik hahú jogu tenke hatudu imajen no hamorin Timor-Leste nia naran,” Sekretáriu Estadu ne’e enkoraja jogadór sira iha edífisiu SEJD, kinta ne’e.

Alende ne’e, FFTL agradese ba Governu liuhosi SEJD tanba  bele autoriza ekipa selesaun nasionál  U-23 hala’o viajen ba liur hodi partisipa  jogu importante ne’e.

“Ami mai hasoru Governu atu ita nia selesaun-sira bele sai ba joga iha liur, fiar katak sira sei hatudu rezultadu di’ak,” Prezidente FFTL, Francisco Martins da Costa Pereira Jerónimo, garante.

Entretantu, Treinadór Prinsipál U-23, Fabio Maçado, hateten, ekipa halo preparasaun ho tempu ne’ebé naruk fiar katak sei hatudu rezultadu di’ak.

“Ha’u prepara jogadór-sira iha tempu naruk, fiar katak sei hatudu rezultadu di’ak, maski nasaun tolu ita atu hasoru hanesan Singapura, Filipina no Korea Súl makas maibé ita labele tauk uluk dehan-sira makas jogu mak sei termina,” dehan treinadór ne’e.

Tanba, Timor-Leste manán ona Filipina, iha jogu-sira tinan liu kotuk hanesan mós ho nasaun Singapura. Iha tinan kotuk, Timor-Leste ho Korea Súl maka empate 1-1.

Kapitaun Ekipa Selesaun U-23, Nelson Viegas, sente kontente hodi reprezenta Timor -Leste dala-ida tan ba joga iha liur hasoru nasaun Zigante-sira.

“Ha’u kompara ami nia preparasaun la hanesan tinan-sira ba kotuk ne’e, treinadór prepara ami ho diferente tebes, fiar katak ami sei hatudu buat ruma,” Kapitaun ne’e afirma.

Tuir oráriu, Timor-Leste sei hasoru ekipa uma-nain Singapura, iha loron 25 outubru, iha loron 28 outubru kontra ekipa Korea Súl no iha loron 31 ekipa Timor-Leste sei hasoru Filipina.

Notísia relevante: FFTL kontinua ezije MS autoriza selesaun nasionál hala’o treinamentu

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here