Diretór Interinu Prizaun Covalima, Alberto de Araújo, loke armari rai ai-moruk nian ne’e, estoke ai-moruk mamuk. Imajen Tatoli/Celestina Teles.

COVALIMA, 21 outubru 2021 (TATOLI)—Diretór Interinu Prizaun Covalima, Alberto de Araújo informa, durante iha situasaun pandemia COVID-19 ne’e klínika iha prizaun Covalima la funsiona tanba pesoál saúde la ativa no estoke ai-moruk laiha.

“Ami-nia preokupasaun mak klínika iha prizaun Covalima la funsiona. Tanba ne’e, bainhira prizioneiru sira moras, ami lori prizoneiru sira konsulta iha Óspital Referál Covalima hafoin lori mai fali ba iha prizaun,” Alberto de Araújo, hateten ba Agência Tatoli iha Prizaun Covalima, kinta ne’e. 

Problema seluk, nia dehan, iha prizaun Covalima laiha postu seguransa no laiha rede separasaun, entaun bainhira loke portaun boot prizaun nian ne’e prizoneiru sira hosi bloku A to’o C hamutuk de’it.

Nia dehan, loloos tenke iha separasaun prizoneiru sira hosi Bloku A to’o C, labele hamutuk tanba laiha rede separasaun entaun prizoneiru sira livre halo movimentu ba-mai. 

Aleinde ne’e, nia informa, tanba de’it laiha postu seguransa ba guarda prizionál sira entaun guarda prizionál sira tuur de’it iha ai-mahon hodi kontrola prizoneiru sira.

“Bainhira tempu udan monuu rai, guarda prizonál sira lahalo buat ida,” nia hateten. 

Prizioneiru sira iha prizaun Covalima hamutuk 104 no hosi númeru ne’e fahe ba bloku A to’o C. 

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here