Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony.

DILI, 20 outubru 2021 (TATOLI)—Ekipa delegasaun Expo Dubai 2020 lideradu hosi Ministru Koordenadór Asuntu Ekonómiku (MKAE), Joaquim Amaral, preparadu hasoru CAC iha kulaker situasaun hodi hatán.

“Estadu kualker momentu prontu ba kualker situasaun, tanba delegasaun ida-ne’e delegasaun ofisiál partisipa iha eventu internasionál ofisiálmente rekoñesidu. Ne’ebé, ami prontu ba iha kualker tempu atu koopera,” Governante ne’e hateten ba jornalista sira relasioan ho FONGTIL aprezenta keixa ba CAC hasru delegasaun Expo Dubai 2020, iha Aoreportu Internasionál Nicolau Lobato, Comoro, Dili, kinta ne’e.

Tanba, tuir Governante ne’e hateten, despeza iba Expo Dubai ne’e relativa tanba Autoridade Nasionál Expo Dubai ne’e harii dezde tinan 2019 iha fulan juñu antes Fretilin hola parte iha Governu.

“Ha’u hanoin despeza ne’e relativu, kuandu ita la planeia ne’e ninia despeza oin seluk, maibé kuandu ita iha planea, tanba ita hatene katak Autoridade Nasionál Expo Dubai ne’e harii desde 2019 iha fulan juñu antes Fretilin hola parte iha Governu,” nia hateten.

Tanba iha tempu ne’ebá, nomeia Prezidente Autoridade Francisco Kalbuadi Lay, hafoin iha ministru foun toma pose halo revizaun ba Prezidente Autoridade foun no fó kontinuasuan ba programa ho nia orsamentu ne’ebé aprovadu ona.

“Ha’u hanoin katak komissaun la halo buat ida fora hosi mandatu ne’ebé iha,” nia dehan.

FONGTIL aprezenta keixa ba CAC

Forum Organizasaun Naun Governamentál Timor-Leste (FONGTIL) kinta ne’e aprezenta keixa ba Komisaun Antí Korrupsaun (CAC, sigla portugés) relasiona ho membru Governu na’in-hitu hamutuk ho delegasaun Timor-Leste 120 ne’ebé partisipa iha Expo Dubai 2020 iha Dubai.

Diretór Ezekutivu FONGTIL, Daniel Santos do Carmo, hateten sosiedade sivil lori keixa formalmente bazea ba kodigu penál Timor-Leste mai hato’o keixa ba Komisaun Antí Korrupsaun (CAC) hanesan polísia espesiál ba kombate krime korrupsaun.

“Keixa ne’ebé ami halo relasiona ho keixa ba membru Governu, Ministru no Vice-Ministru na’in-hitu ho delegasaun 120 ne’ebé ba partisipa iha Expo Dubai 2020,” Daniel Santos do Carmo, hateten ba jornalista sira iha Edifísiu CAC, Farról, Dili.

Razaun fundamentál ne’ebé FONGTIL lori keixa ba CAC, tanba tuir dadus ne’ebé FONGTIL hetan katak delegasaun ne’ebé partisipa iha Expo Dubai 2020 ne’e fó prejuiju ba Estadu signifika Estadu lakon.

“Entaun, kodigu penál Timor-Leste artigu 13/200/14 fó dalan ba ema individu koletiva, sidadaun se de’it bele hato’o keixa ba polísia espesiál kombate korrupsaun hanesan CAC, bainhira ami deskonfia katak aktu ka partisipasaun Timor-Leste iha Expo Dubai 2020 fó prejuiju ba ita-nia Estadu ka halo ita-nia Estadu lakon,” nia dehan.

Tanba prejuiju ba Estadu, liuhosi aprezenta keixa ne’e FONGTIL ezije ba CAC atu foti medida ba delegasaun Expo Dubai 2020 bainhira to’o iha Timor-Leste.

“Ida-ne’e ami ezije halo ba membru Governu na’in-hitu nomós ho ema 120. Ida-ne’e lasignifika atu lori kedas sira ba tribunál ka ba kadeia maibé foti medida atu prosesa sira tuir padraun legál ne’ebé Komisaun Antí Korrupsaun iha. Karik, sira iha duni evidênsia ne’ebé ami hato’o prenxe duni rekezitu sira, komete irregularidade ruma ka aktu sira-ne’ebé sira halo, prenxe duni krime ka lae, ida-ne’e kompeténsia Komisaun Anti Korrupsaun,” nia esplika.

Ho keixa ne’e, FONGTIL iha responsabilidade tomak ba aktu ne’ebé halo no brani atu foti nia konsekuénsia.

“Ami responsavél tomak ba aktu ne’ebé ami halo, brani atu foti nia konsekuénsia tomak hodi mai hato’o keixa ba Komisaun Anti Korrupsaun,” nia afirma.

Komisáriu Komisaun Antí Korrupsaun (CAC), Sergio Hornai, hateten hanesan organizasaun Polísia Kriminál tuir kódigu prosesuál penál ne’ebé eziste iha Timor-Leste, katak instituisaun hanesan Ministériu Públiku, Orgaun Polísia Kriminál hotu-hotu ne’ebé eziste iha rai ida-ne’e bainhira iha keixa ka denúnsia sira-ne’ebé hatama mai iha CAC, CAC nia obrigasaun atu rejista no fó kontinuidade ba iha prosesu ida-ne’e.

“Orgaun Polísia Kriminál hotu-hotu ne’ebé eziste iha rai ida-ne’e bainhira iha keixa, bainhira iha denúnsia sira-ne’ebé hatama mai iha instituisaun, instituisaun nia obrigasaun atu bele simu, rejista no fó kontinuidade ba iha prosesu ida-ne’e rasik. Atu to’o iha ne’ebá, presiza halo analiza ida kle’an, depois halo nia sekuénsia sira tuir marsa prosesuál sira-ne’ebé tuir ona ita-nia lei sira haruka,” komisáriu ne’e esplika.

Kona-bá CAC tenke foti medida hasoru delegasaun Timor-Leste ba Expo Dubai, Sérgio afirma, ida-ne’e hanoin mai hosi FONGTIL maibé razaun sira-ne’e hotu validu, bainhira hatun ba idak-idak nia natureza.

“Bainhira natureza sira reuni no prenxe rekezitu sira-ne’ebé lei hateten, autoridade sira-ne’ebé kompetente sei ezerse sira-nia funsaun hodi halo medida sira-ne’e, Buat sira-ne’e hotu depende ba iha sirkunstánsia, depende ba iha tramitasaun (regra) sira-ne’ebé lori daudaun ita atu halo medida Polísia atu ezerse nia funsaun,” nia dehan.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here