Rezultadu jogu iha jornada 17 entre FIEL no Kuda Ulun. imajen/AFTL

DILI, 20 outubru 2021 (TATOLI)– Ekipa FIEL FC konsege manán nia adversáriu Kuda Ulun FC ho rezultadu 4-3, iha jornada 17 Pra Liga Futsal Timor-Leste ne’ebé halao iha kampu futsal FALINTIL-Forsa Defeza Timor-Leste (F-FDTL) Fatuhada, kuarta kalan.

Iha jogu primeira parte, ekipa rua lansa kedan  kontra no atake ba malu, maibé kontra no atake hirak ne’e la hela le’et de’it tanba hatudu duni prova iha ekipa FIEL forsa liu to’o ikus hodi manán jogu.

Jogu sai manas makas iha minutu lima no ualu, primeira parte jogadór FIEL Van Basten prodús kedan golu rua hodi muda rezultadu ba 2-0.

Hosi golu ne’e, ekipa Kuda Ulun esforsu an ho tékniku profisionál ne’ebé iha, nune’e iha minutu 13, jogadór Domingos Esteven responde kedan golu ida hodi muda rezultadu mamuk ba 2-1.

Nune’e mós, iha minutu 17, jogadór Kuda Ulun Domingos Amaral lansa tan golu ida rezultadu empate provizóriu ba 2-2.

Kuda ulun haksolok ho golu ne’ebé iha sira tenke servisu makas atu halo tan golu ruma, maibé iha minutu 19 jogadór FIEL, Delio Magno halo fali golu ida haketak rezultadu ba 3-2.

Jogu la’o to’o minutu 32, Delio Magno lansa tan golu ikus hodi hatur rezultadu ba 4-2, golu ne’e halo kuda ulun tenke hisik kosar makas iha kampu laran atu hatama golu.

Serbisu hirak hosi kuda ulun iha duni rezultadu, iha minutu 38, jogadór Zeca Pereira halo duni golu ida hodi muda rezultadu ba 4-3.

Golu ne’e ba-dala ikus ona tanba to’o segunda parte ramata ekipa rua la produs tan golu, nune’e vitória metin ba FIEL.

Maski, manán maibé ekipa rua nafatin tuur iha lina mean hodi hein jogu seluk tuir mai iha oportunidade bele sae ba liña modok.

Notísia relevante: Baucau All Star “lolo” Academica 8-4

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here