Ekipa hosi Ministériu Saúde halo advokasia ba profesór RAEOA, atu implementa programa MDA ba estudante idade tinan neen to'o hitu. Imajen Agência TATOLI/Elo Nini.

OÉ-CUSSE, 21 outubru 2021 (TATOLI) — Eskola hamutuk 36 iha Rejiaun Administrativa Espesiál Oé-Cusse Ambeno (RAEOA), sai alvu ba programa Mass Drug Administration (MDA) no filarioze linfátika, hodi halo peskiza ba estudante sira ho idade tinan neen to’o hitu.

Programa MDA ne’e sei foka ba moras oin haat; moras lumbriga labarik sira-nia kabun laran, lumriga iha raan ne’ebé kauza hosi ain-potis, kanek iha isin-kulit no escabiose ka isin-katar.

Purtantu, ekipa delegasaun hosi Ministériu Saúde (MS) koopera hamutuk ho autoridade RAEOA liuhosi Sekretaria Rejionál ba Asuntu Edukasaun Solidariedade Sosiál no Inkluzaun halo advokasia ba responsável eskola sira, nune’e bele enkoraja inan-aman no estudante sira atu partisipa iha programa ne’e.

Tanba kalendáriu hosi Ministériu Saúde sei realiza programa MDA ba estudante idade tinan neen to’o hitu, hahú iha fulan novembru ne’e.

“Programa MDA ne’e la’ós programa foun maibé programa kontinuasaun hosi 2015 to’o 2019, tanba ne’e ami presiza tebes hodi koopera ho edukasaun tanba alvu ba atividade ne’e ba eskola 36, espesialmente ba idade tinan neen to’o hitu tanba iha novembru iha hahú ona iha Oé-Cusse,” Ofisiál MDA, Augusto Moreira, ko’alia iha iha salaun Alfándega, Palaban, Oé-Cusse.

Xefe Departamentu Apoia Asaun Sosiál eskolár iha eerbisu Edukasaun RAEOA, Domingos Ramos Tebi, agradese tanba programa ne’e importante ba estudante sira.

Edukasaun RAEOA mós hetan ona despaxu hosi Ministériu Edukasaun, Juventude no Desportu (MEJD) nomoos despaxu hosi Diretór Jerál ensinu pre-eskolár no ensinu rekorente, atu kolabora ho ekipa sira-ne’ebé sei halo peskiza transmisaun ba programa MDA no filarioze linfátika ne’e.

Diretóra Servisu Saúde Rejionál, Lolita Lay do Santos, agradese ba governu sentrál tanba sempre apoia servisu saúde atu fó asisténsia saúde ba estudante sira ho idade minoridade liuhosi programa MDA.

Entretantu, eskola 36 ne’ebé edukasaun RAEOA identifika kuaze sub-rejiaun haat envolve hotu hosi sub-rejiaun Oésilo, Pásabe, Nítibe no Pante Makasar.

Objetivu hosi peskiza ne’e atu haree prevalénsia mikro-filariál iha raan-laran no infesaun lumbriga intestinál. Nune’e mós bazea despaxu hosi MEJD ne’ebé Agência TATOLI asesu, ho númeru referénsia 093 GDG-EPEBR/MEJD/VIII/2021 2021 hato’o ba Diretór Edukasaun iha munisipiu neen Baukau, Díli, Lautem, Manatuto, Manufahi, Viqueque no RAEOA, atu koopera ho Ministériu Saúde nune’e halo peskiza liuhosi programa MDA.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here