Sekretáriu Rejionál ba Asuntu Terra no Propriedade, António Hermenegildo da Costa. Imajen Agência TATOLI /Abílio Elo Nini.

OÉ-CUSSE, 20 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Terra no Propriedade, aloka $56,640.30, atu harii kuadru aviza unidade 100 iha fatin risku ba dezastre naturál.

Montante orsamentu ne’e foti hosi Orsamentu Jerál Estadu (OJE) 2021 hosi totál millaun $127, atu harii kuadru aviza unidade 100 iha fatin risku ba dezastre naturál hodi afeta ba patrimónia komunidade nian iha tempu udan.

Hafoin akontese siklone tropikál seroja iha loron 4 abríl liubá, Autoridade RAEOA orienta kedas ekipa tékniku sira halo identifikasaun área ne’ebé hamosu risku ba dezastre naturál, hamosu erosaun, inundasaun, rai-halai no mota estraga sasán komunidade.

“Entaun presiza proteje harii kuadru aviza atu fó xamada atensaun ba komunidade labele halo atividade iha fatin sira-ne’e, nune’e iha futuru labele akontese,” Sekretáriu Rejionál ba Asuntu Terra no Propriedade, António Hermenegildo da Costa, informa ba Agência TATOLI iha Oé-Cusse, kuarta ne’e.

Nia fundamenta, ordenamentu territóriu identifika ona fatin risku ba dezastre naturál hamutuk 95, hahú hosi mota Noe-Fefan, suku Lifau, sub-rejiaun Pante Makassar to’o Citrana, suku Bene-Ufe sub-rejiaun Nítibe.

Nune’e mós hosi mota Noe-Fefan sa’e to’o mota Noel-Ekat, suku Bobometo, sub-rejiaun Oésilo, no kontinua hosi mota Tono, suku Cunha to’o mota Noe-Toko, suku Ban-Afi, sub-rejiaun Nitibe, nune’e tuir ajenda sei harii kuadru aviza hamutuk unidade 100.

“Iha rezultadu identifikasaun ba área fatin risku sira-ne’e, iha populasaun barak mak halo uma besik mota-ninin, besik ponte, foho-lolon halo to’os iha mota-ninin, no halo uma besik lagoa no tasi-ninin, ida-ne’e sai risku boot ba dezastre naturál,” nia dehan.

Iha tinan ne’e, autoridade loke ona tenderizasaun no anunsia ona rezultadu atu ezekuta projetu ne’e hosi empreza Ta’ek Casse Unipesoál, Lda, ho valór kontratu hamutuk rihun $56,640.30.

Objetivu hosi polítika ne’e atu proteje fatin hirak-ne’ebé idenfitika ona, nune’e bele fó hanoin ba komunidade atu halo distánsia ba rai-maran kuaze metru 25, hosi mota-ninin inklui labele halo atividade tesi ai-horis sira, halo uma iha mota-ninin, hodi minimiza inundasaun ka mota sa’e.

Molok realiza polítika ne’e, autoridade RAEOA sei informa ba autoridade lokál sira, hanesan jestór, xefe suku, xefe aldeia no lia-na’in sira atu kontinua habelar informasaun ba komunidade hodi asegura-an hosi fatin riksu.

Tuir Lei númeru 3/2014 (kriasaun RAEOA), deliberasaun autoridade númeru 5/2016, 29 setembru sita pontu tolu mak hanesan; dahuluk, bandu totál ateru natar no bee-lihun iha lagoa, daruak, bandu totál halo konstrusaun ruma la ho autorizasaun hosi orgaun kompetente-sira iha RAEOA.

Nune’e mós Governu Sentrál fó atensaun  liuhosi lei protesaun sivíl númeru 12/2020, 02 dezembru, hodi kriminaliza komunidade ne’ebé harii uma iha fatin risku ba dezastre naturál, hanesan mota ninin, foho-lolon, tasi ninin no besik lagoa.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here