R4D-ILO entrega dokumentu programa foun ba Administradór munisípiu Viqueque, Januário Soares ‘Boly’, iha salaun Administrasau, kuarta (20/10). Imajen TATOLI/Vitorino Lopes da Costa

VIQUEQUE, 20 outubru 2021 (TATOLI)–Xefe Tékniku Roads For Development (R4D), Peter Smith, hamutuk ho ekipa International Labour Organization (ILO), iha kuarta ne’e, aprezenta programa formasaun ba enjiñeiru junior, ba Administradór munisípiu Viqueque, Januário Soares ‘Boly’.

“Ohin ami mai hasoru Administradór hodi aprezenta programa foun molok implementa,” Xefe Tékniku informa ba Agência TATOLI, hafoin ramata sorumutuk, iha sala enkontru Admiministrasaun Viqueque, kuarta ne’e.

Tuir responsável programa ne’e, R4D serbisu tinan-ualu ona iha Viqueque hodi halo konstrusaun ba estrada rurál, maibé agora iha faze foun, asina ona kontratu iha loron 17 juñu 2021, entre Ministériu Obra Públika (MOP) no Departemetu Negósiu Estranjeiru Austrália.

Notísia relevante: MOP anunsia ona rezultadu konkursu estrada rurál Dili no Viqueque

“Akordu ne’e hanesan subsidiáriu no ILO sei kontinua faze daruak hodi halo konstrusaun, maibé projetu foun ne’e ami muda fali ho ninia durasaun fulan-18, ne’ebé sei ramata iha dezembru 2022, ho alokasaun totál hamutuk millaun $5,4,” nia akresenta.

Programa R4D kompostu hosi kria planu serbisu, formasaun no programa sira seluk ne’ebé trasa no implementa daudaun.

“Programa formasaun kona-ba ambiente no  jéneru, atu envolve komunidade ba serbisu, ne’ebé hosi faze foun ne’e ami sei atensaun ba kapasidade no sustentablidade,” nia tenik.

Programa formasaun sei implementa iha Dili no munisípiu Baucau, hafoin konvida formandu hosi Viqueque hodi partisipa.

Iha biban hanesan, Administradór munisípiu Viqueque, Januario Soares ‘Boly’, apresia no agradese ba ekipa R4D, ne’ebé hahú relata serbisu mai munisípiu.

“Agradese ba R4D ne’ebé atu implementa programa formasaun ba foin-sae sira, liuliu ba área konstrusaun. Importante ba ami, atividade saida de’it maka atu implementa iha Viqueque, ami tenke iha koñesementu hodi bele akompaña progresu,” nia fó hanoin.

Biban ne’e, Xefe Tékniku R4D entrega dokumentu ofisiál implementasaun programa ba Administradór munisípiu Viqueque no Diretór Servisu MOP.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here