Sekretáriu Rejionál ba Asuntu Agrikultura, José Eta hala'o fiskalizasaun ba projetu rekonstrusaun Gabiaun iha suku Bobometo, iha loron tersa, 19/10/2021. Imajen / Mídia Agrikultura.

OÉ-CUSSE, 20 outubru 2021 (TATOLI) —  Projetu rekonstrusaun Gabiaun ne’ebé lokaliza iha aldeia Nianapu, suku Bobometo, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA) gasta $91,895.38.

Projetu rekonstrusaun Gabiaun ne’e ezekuta hosi empreza lokál Banila Unipesoál Lda, ho valór kontratu $91,895.38, medida metru 300 ho durasaun serbisu loron 120.

Sekretáriu Rejionál ba Agrikultura, José Eta, halo ona fiskalizasaun ba projetu rekonstrusaun Gabiaun iha área refere atinje ona 32%.

“Obra ne’e sei proteje área natar sira iha Nianapu ho ektare 45,49 ne’ebé envolve benefisiáriu hamutuk uma-kain 105,” José Eta informa Agência TATOLI, iha Oé-Cusse, kuarta ne’e.

Objetivu hosi fiskalizasaun ne’e, atu observa direita progresu serbisu, nune’e bele enkoraja empreza no traballadór sira aselera obra ne’e.

Autoridade RAEOA loke konkursu públiku ba projetu rekonstrusaun Gabiaun hamutuk unidade 20, kobre ba sub-rejiaun Oésilo, Nítibe no Pante Makassar ho montante millaun $2-resin ne’ebé aloka hosi Orsamentu Jerál Estadu (OJE) 2021.

Projetu rekonstrusaun Gabiaun ne’e atu rekupera área produtividade ne’ebé hetan estragu hosi siklone tropikál seroja ne’ebé akontese iha loron 4 abríl liubá.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here