Vise-Prezidente Parlamentu Nasionál, Deputadu Luis Roberto da Silva. Imajen TATOLI/Doc.

DILI, 20 outubru 2021 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, akompañadu hosi Vise-Prezidente Parlamentu Nasionál, Luis Roberto halo audiénsia ho ofisiál Misaun Akonsellamentu Eleitorál Organizasaun Nasaun Unida (ONU) hodi ko’ali kona-ba eleisaun jerál iha Timor-Leste.

Notísia Relevante: Prezensa misaun akonsellamentu eleitorál ONU importante ba eleisaun jerál

“Objetivu hosi sorumutu ne’e ko’alia kona-ba atu halo akonsellamentu ba iha ita-nia eleisaun jerál liu-liu eleisaun prezidensiál ne’ebé mak sei akontese iha tinan oin,” Vise-Prezidente Parlamentu Nasionál, Luis Roberto, hateten ba jornalista sira hafoin ramata sorumutu ho ofisiál Misaun Akonselamentu Eleitorál Organizasaun Nasaun Unida iha PN, kuarta ne’e.

Prezensa Delegasaun ONU nian ne’e atu fó asisténsia hodi akompaña hosi eleisaun prezidensiál no parlamentár ne’ebé sei akontese, tanba ne’e Parlamentu Nasionál nu’udar uma fukun apresia tebes hakarak duni prezensa hosi Misaun ONU nian ne’e, hodi hadia di’ak liután atu evita fraude eleitorál iha festa demokrásia ne’e.

“Sira-nia ekipa mai uluk ona hanesan sekretáriadu ONU nian ne’ebé antes ne’e hasoru ona Prezidente Repúblika. Agora, ahsoru PPN no sei hasoru ho líder órgaun soberania sira seluk no órgaun indepedente sira hanesan Komisaun Nasionál Eleisaun (CNE, siglá portugés), Sekretária Tékniku Administrasaun Eleitorál (STAE),” nia hateten.

Biban ne’e, delegasaun ONU nian husu Parlamentu Nasionál kona-ba estabilidade seguransa ba eleisaun ne’ebé atu mai ho situasaun COVID-19, ligadu ba taxa partisipasaun eleitór sira hodi ezerse sira-nai votu liu-liu iha eleisaun prezidensiál 2022 no eleisaun parlamentár 2023.

Atu aumenta taxa partisipasaun iha eleisaun prezidensiál, daudaun ne’e Governu implementa polítika nasionál ida hodi indika membru Governu sira hala’o kampaña nasionál vasinasaun iha territóriu nasionál atu bele hasai taxa kobertura vasinasaun, liu-liu atu hasa’e númeru vasina ba munisípiu sira-ne’ebé nia persentajen sei menus.

Jornalista : Nelson de Sousa

Editór       : Cancio Ximenes  

PUBLISIDADEiklan

HAKEREK NO HATÁN

Please enter your comment!
Please enter your name here