Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 19 outubru 2021 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, hateten, daudaun simu ona despaisu hosi Ministru Defeza (MD), Filomeno de Jesus da Paixão, atu halo rekrutamentu ba kadete foun iha 2022.

“Ha’u hanoin Ministériu Interiór no Polísia Nasionál Timor-Leste simu despaisu konjutu ida hosi Ministériu Defeza atu halo rekutamentu ba kadete foun polísia nian iha tinan oin (2022),” Komisáriu Faustino, informa ba jornalista sira iha Kuartel-Jerál PNTL, Caicoli, tersa ne’e.

Nune’e, Komandu Jerál fó ona kompetensia ba Segundu Komandante PNTL, Komisáriu Polísia Mateus Fernandes maka sei lidera komisaun rekrutamentu. 

“Ami nia esperansa katak ho despaisu ne’e bele mós iha orsamentu ba rekrutamentu atu ekipa ne’ebé hosi Ministériu Defeza no Ministériu Interiór hamutuk ho PNTL hala’o serbisu,” Komandante Jerál ne’e espera.

Hatán totál kadete foun ne’ebé sei rekruta, Komisáriu Faustino dehan seidauk define tanba depende ba desizaun ekipa konjuntu rekrutamentu.

Entretantu, Governu liuhosi Ministériu Defeza (MD) ho koordenasaun Ministériu Interiór (MI) planea ona atu halo rekrutamentu konjuta ba membru F-FDTL no PNTL.

Notísia relevante: Governu planeia rekrutamentu konjunta membru PNTL-F-FDTL

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here