Motorizada hamutuk 65 ne’ebé MSSI entrega ba tékniku sosiál hodi fasilita servisu atendimentu, iha edifísiu MSSI, Caicoli, kuarta (20/19). Imajen TATOLI/Francisco Sony

DILI, 20 outubru 2021 (TATOLI)–Ministériu Solidaridade Sosiál no Inkluzasaun (MSSI) iha kuarta ne’e, entrega motorizada 65 inklui ekipamentu ba tékniku sosiál iha postu administrativu 65 hosi munisípiu 11, la inklui Rejiaun Administrativa Espesiál Oé-cusse Ambeno (RAEOA).

Vise Primeiru-Ministru no Ministra Solidaridade Sosiál no Inkluzasaun, Armanda Berta dos Santos. Imajen TATOLI/Francisco Sony

Vise Primeiru-Ministru no Ministra Solidaridade Sosiál no Inkluzasaun (MSSI), Armanda Berta dos Santos, hateten, inisiativa ne’e atu fasilita tékniku sira hala’o atividade sosiál iha baze.

“Ha’u husu ba ita-boot sira ne’ebé ohin simu sasán patrimóniu Estadu, tenke uza ho kuidadu tuir servisu Estadu,” Ministra hateten iha edifísiu MSSI, Caicoli, kuarta ne’e.

Iha sorin seluk, Diretór Nasionál Orsamentu Jestaun Finansa no Patrimoniál MSSI, Jimmy Valente de Orlean dos Reis, hateten, motorizada ne’ebé fó ba tékniku sosiál iha postu administrativu sira, fahe ba kategória rua hanesan Honda 160 cc hamutuk 41 no Honda Supra 120 cc iha 24, nune’e hamutuk 65.

Ekipamentu ne’ebé distribui hanesan komputadór, printer, Uninterruptible Power Supply (UPS) enerjia hamutuk 65.

Diretór Nasionál Orsamentu Jestaun Finansa no Patrimoniál MSSI, Jimmy Valente de Orlean dos Reis. Imajen TATOLI/Francisco Sony

“Orsamentu ne’ebé utiliza sosa sasán sira, ba motór $110.255, ekipamentu informátika $161.270, meza no kadeira sira hamutuk $36.625, ne’ebé totál hamutuk $308.120,” nia informa.

Ekipamentu sira ne’e la inklui ba RAEOA tanba rejiaun ne’e iha prosesu administrativu ketak.

“Liuhosi prosesu protokolu, ba oin ami sei koordena oinsá bele kanaliza sasán ba Oé-cusse, tanba ita hatene sasán atu ba iha ne’ebá tenke hetan autorizasaun hosi autoridade rasik, tanba ne’e ita sei estabelese akordu ida, hafoin haruka ba,” nia tenik.

Diretór ne’e husu ba postu administrativu ne’ebé ohin simu uluk ona motorizada inklui ekipamentu, tenke uza ho kuidadu iha terrenu.

Antes ne’e, iha tinan 2008, MSSI fahe ona ba tékniku sosiál sira iha postu administrativu.

“Ami tenta ba oin morizada sira ne’ebé di’ak kontinua uza no ida ne’ebé ladi’ak sei dada no halo prosesu lelaun,” nia dehan.

Nune’e mós, Benefisiáriu, Gergio da silva, nu’udar téniku sosiál iha postu administrativu Laclubar, munisípu Manatuto, agradese ba Governu liuhosi MSSI.

“Ha’u agradese ba MSSI tanba apoiu ona ami ho fasilidade sira ne’e, nune’e bele fasilita ami halo servisu atendimentu ba komunidade iha baze tanba bainhira laiha transporte bele difikulta ami-nia servisu,” nia akresenta.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here