Família matebian hamutuk ho CIGC no servisu saúde Covaima haloot mate-sin Norberto Inácio Ximenes iha simetériu públiku Ai-Oan, Lalawa, Tilomar, Covalima. Imajen Tatoli/Celestina Teles.

COVALIMA, 20 outubru 2021 (Tatoli)—Sala Situasaun Sentru Integradu Jestaun Krize (CIGC, sigla portugés) no Servisu Saúde Munisípiu Covalima haloot ona mate-isin Norberto Inácio Ximenes, ne’ebé mate ho COVID-19 iha Simetériu Públiku Ai-Oan tuir protokolu saúde no kultura postu administrativu Tilomar nian.

Ita iha ona óbitu. Ba prosesu fúnebre, hafoin mate-isin lori hosi Dili mai iha Covalima, ita koordena ho família sira oinsá ita bele haloot tuir ita-nia tradisaun kultura Timor nian. Mate-isin rai iha uma lisan durante oras ida, hafoin ita haloot tuir protokolu saúde nian,” Koordenadór Pilar VI Kontrola Infesaun COVID-19 Munisípiu Covalima, Ermelito da Cruz, hateten ba jornalista sira iha simetériu Públiku Ai-Oan, suku Lalawa, postu administrativu Tilomar, kuarta ne’e. 

Molok haloot mate-isin, ekipa prevensaun no kontrolu infesaun hala’o dezinfeta ba kaixaun no rai-kuak hafoin halo prosesu fúnebre tuir protokolu saúde no kultura suku Lalawa nian. 

Matebian Norberto Inácio Ximenes hosi suku Lalawa, postu administrativu Tilomar, munisípiu Covalima ne’ebè moris iha loron 08 fulan-setembru 1989. Oan hosi inan-aman, Basílio Ximenes no Brandina Bui. Matebian hanesan oan-mane mesak ne’ebé hakotu nia peregrinasaun moris iha loron 18 fulan outubru tinan 2021. 

Diretòr servisu saúde munisípiu Covalima, Filipe Pereira, informa nia parte laiha informasaun kona-ba matebian Noberto Inácio Ximenes nia kronolojia moras ne’e.

Tuir observasaun, Agência Tatoli nota katak durante iha prosesu fúnebre ne’e, família matebian halo kooperasaun di’ak ho Sala Situasaun Sentru Integradu Jestaun Krize (CIGC, sigla portugés no servisu saúde munisípiu Covalima hodi haloot matebian ho dignu.

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here