Prezidente Komisan C, Deputada Maria Angelica Rangel. Imajen/Antonio Goncalves

DILI, 20 outubru 2021 (TATOLI)–Komisaun C ne’ebé trata asuntu Finansa Públika, aprova ona kalendáriu debate proposta-lei Orsamentu Jerál Estadu (OJE) 2022 ho unanimidade.

Notísia Relevante: Proposta-lei OJE 2022 baixa ona ba KEP sira

“Ohin, ami halo aprovasaun kalendáriu iha Komisaun C ba debate proposta lei OJE 2022,” Prezidente Komisaun C, Maria Angélica Rangel, hateten ba jornalista sira iha Parlamentu Nasionál, kuarta ne’e.

Kalendáriu ne’e hahú ho semináriu panaroma orsamentál iha loron 26 to’o 29 outubru 2021 iha Tibar, nune’e iha loron 04 novembru sei halo Audiénsia Públika hafoin debate jeneralidade no espesialidade termina finál globál iha loron 17 dezembru, no Komisaun C sei halo redasaun finál iha 20 dezembru 2021 hodi haruka ba Prezidente Repúblika.

“Proposta-lei OJE Governu haruka mai ho karáter normál signifika sei halo diskusaun sira períodu fulan ida-nia laran,” nia hateten.

Prezidente Parlamentu Nasionál, Aniceto Longuinhos Guterres Lopes, iha tersa (19/10) ne’e pronunsia liuhosi reuniaun plenária baixa ona proposta lei númeru 35/V (4) OJE 2022 ba Komisaun C no Komisaun espesializada sira hodi halo analiza no relatóriu paresér.

Antes ne’e, iha loron 15 outubru tinan ne’e, Governu liuhosi Ministériu Finansa submete ona proposta Lei Orsamentu Jerál Estadu (OJE) 2022 ho montante billaun $1,675 ba Parlamentu Nasionál.

Notísia Relevante: Governu submete Proposta Lei OJE 2022 biliaun $1,675 ba PN

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here