Membru foun F-FDTL aprezenta an iha Kuartél Jenerál Fatuhada, molok hakat ba integra an iha Sentru Formasaun no Treinu Metinaro, segunda (27/09). Imajen Tatoli/Francisco Sony.

DILI, 20 outubru 2021 (TATOLI)—Kadete foun FALINTIL-Forsa Defeza Timor-Leste (F-FDTL), Adelio Fernandes do Rego, hela iha aldeia Bekusi Sentru, suku Becora, Dili no mai hosi Munisípiu Manufahi halai sai hosi komponente Sentru Formasaun no Treinu Metinaro, tersa (19/10), madrugada, tanba la aguenta ho treinamentu sistema militár.

Vise Xefe Estadu Maior Jenerál F-FDTL, Major Jenerál, Domingos Raul “Falur Rate Laek”, informa membru kadete foun F-FDTL na’in-ida, ne’ebé daudaun tuir treinamentu iha komponente Sentru Formasaun no Treinu Metinaro halai sai tanba la aguenta treinamentu sistema militár.

“Ha’u informa katak kadete ida, ohin madrugada halai sai tan iha sentru instrusaun Metinaro, tanba la augenta ho treinamentu. Daudaun Polísia Militár detein ona kadete ne’e hodi halo investigasaun,” Major Jenerál Falur Rate Laek, informa hafoin enkontru ho Prezidente Repúblika Francisco Guterres Lú-Olo, iha Palásiu Prezidente, Bairru-Pité, kuarta ne’e.

Antes ne’e, kadete mane ida hosi munisípiu Lautém mós rejiga an tanba la toman treinamentu sistema militár.

“Imi iha liur hanoin iha vida militár ne’e fasil, maibé  buat ida militár ne’e susar. Ami sira hamriik ho deviza agora ne’e liuhosi prosesu luta ne’ebe nakonu ho susar no terus maka konkista ida ne’e,” Vise Xefe Estadu Maior Jenerál F-FDTL ne’e akresenta.

Daudaun, kadete foun F-FDTL-sira nia treinamentu to’o ona iha nivél inísiu oinsá atu koñese ambiente instituisaun F-FDTL, oinsá uza farda no formatura inklui seluk tan.

“Ha’u hanoin imposivél atu troka kadete ne’ebe halai sai ne’e ho kadete reserva tanba liu ona treinamentu prosesu treinamentu barak,” Falur Rate Laek subliña.

Notísia relevante: Membru foun F-FDTL ida husu rejigna an tanba la toman sistema militár

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here