Traballadór sira ezekuta hela obra Estadu iha terrenu. Imajen TATOLI/António Gonçalves

DILI, 20 outubru 2021 (TATOLI)—Fundu Infraestrutura ne’ebé eziste iha tinan 2011 hodi finansia projetu infraestrutura sentrál no kapitál dezenvolvimentu atu apoiu implementasaun Planu Estratéjiku Dezenvolvimentu (PED), to’o tinan 2021 finansia ona projetu 1.886.

Tuir livru orsamentu tinan 2022 ne’ebé Agência TATOLI asesu iha kuarta ne’e, alokasaun orsamentu iha Fundu Infraestrutura desde tinan 2011 to’o agora hamutuk biliaun $5,1, ne’ebé ezekusaun atinje ona biliaun $3,2 ka 62% hosi totál, ne’ebé projetu 1.065 mak konklui ona no hosi projetu ne’e kria ona empregu hamutuk 65.561.

Aleinde ne’e, iha projetu 330 mak ein kursu, projetu foun 236, projetu ne’ebé seidauk inisia hamutuk 242 no projetu 13 mak pendente.

Ba períodu tinan 2022 alokasaun ba fundu ne’e hamutuk millaun $332,5, programa hamutuk 26 mak pasa, ne’ebé desde Fundu Infraestrutura iha restruturasaun iha sub-programa hamutuk 70.

Iha dokumentu ne’e, deskreve mós katak, desde tinan 2011 to’o 2021, proposta atu asesu ba Fundu Infraetrutura hosi instituisaun Estadu hamutuk 1.281.

Programa hosi Fundu Infraestrutura mak iha área enerjia konetividade rodoviária, servisu saúde no edukasaun, kriasaun empregu entre setór no servisu finanseiru, abastesimentu alimentár, infraestrutura exportasaun no importasaun bens, kombustível no produtu petrolífera, abastesimentu bee ba irrigasaun  no infraestrutura bázika ba edifísiu públiku, asesu estrada no servisu transporte, inklui portu no aeroportu, seguransa no defeza, infraestrutura ba setór turizmu, telekomunikasaun no servisu seluk hanesan konetividade no komunikasaun, no seluk tan.

Nune’e, rezultadu no realizasaun implementasaun programa hosi Fundu Infraestrutura, kompostu hosi enerjia 274MW no 523 projetu konklui ho rezultadu konstrusaun ba sentrál elétrika Hera no Betano no reabilitasaun sentál elétrika Inur Sakato iha Oé-cusse, konstrusaun liña transmisaun alta voltajen 150KV iha tinan 2015, uma 77.062 iha tinan 2012 to’o 2015 no uma 43.635 iha tinan 2016 mak asesu ona destribuisaun enerjia no projetu eletrisidade seluk tan.

Aleinde ne’e, área irrigasaun ektare 7.416 mak konstrui no reabilita, inklui irrigasaun Larisula, Carau-ulun fazze I no II, Raibere no Oebaba faze I no II, eskema irrigasaun Bebui/Uatulari, konstrusaun moru protesaun eskema irrigasaun Cassameta, konstrusaun gabiaun no normalizasaun riu Vemasse ba protesaun irrigasaun Buluto.

Iha projetu 21 edifísiu públiku mak konklui ona hanesan Ministériu Justisa, Rezidénsia Prezidente Parlamentu Nasionál, merkadu Taibessi no Manleuana, edifísiu Komisaun Nasionál Eleisaun (CNE, sigla portugés), Ministériu Finansa, rebilitasaun no reparasaun moru no edifísiu Tribunál Distritál Baucau no Suai,konstrusaun no supervizaun edifísiu Komisaun Funsaun Públika (KFP) no konstrusaun edifísiu Ministériu Solidaridade Sosiál no Inkluzaun.

Iha mós projetu konstrusaun no reabilitasaun estrada hamutuk 251 ne’ebé konklui ona desde tinan 2011 to’o agora, estrada rurál ho naruk kilómetru 290 ne’ebé projetu ne’e konklui entre tinan 2018 to’o 2021, konstrusaun no reabilitasaun ponte hamutuk 26, no implementasaun estrada nasionál ho naruk kilómetru 370,2 ne’ebé ninia progresu atinje ona 68% no implementa liuhosi empréstimu externu.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here