BCTL liuhosi Unidade Informasaun Finanseiru disemina informasaun kona-ba prevensaun kombate brankamentu kapitál no finansiamentu terorizmu iha Timor-Leste ba estudante Eskola Sekundária Tékniku Vokasionál, Grupu Teknólojia Indústria Becora, iha salaun eskola, Becora, kuarta (20/10). Imajen TATOLI/Francisco Sony

DILI, 20 outubru 2021 (TATOLI)—Banco Central de Timor-Leste (BCTL) liuhosi Unidade Informasaun Finanseira (UIF), realiza semináriu hodi disemina informasaun kona-ba prevensaun no kombate brankamentu kapitál no finansiamentu terorizmu ba estudante 120 iha eskola Ensinu Sekundáriu Tékniku Vokasionál (ESTV) hosi departementu neen.

Diretora Ezekutiva UIF-BCTL, Maria José de Jesus Sarmento, hateten, inisiativa ne’e nu’udar atividade anuál ne’ebé unidade ne’e kria ona, ho objetivu atu fahe informasaun ba públiku ein jerál atubele hatene atus krime ne’ebé kualker tempu bele akontese iha Timor–Leste inklui ninia risku sira.

Diretora Ezekutiva UIF-BCTL, Maria José de Jesus Sarmento. Imajen TATOLI/Francisco Sony

“Tinan kotuk ami halo sensibilizasaun ba parte akadémiku sira no tinan ne’e ami deside halo ba estudante ensinu sekundáriu sira. Tanba ne’e, ami hahú uluk ho estudante iha eskola Tékniku Vokasionál Becora atubele iha informasaun natoon kona-ba asaun krime rua,” Diretora Maria UIF, iha salaun  eskola, Becora, kuarta ne’e.

Tuir reponsável atividade ne’e, estudante tenke hatene atus krime, nune’e bele hadook-an hosi asaun krime rua.

“Bainhira iha ema ruma hakarak envolve estudante sira iha atividade brankamentu kapitál no finansiamentu terorizmu, tenke rejeita atu labele tama iha risku sira ne’e,” nia akresenta.

Diretór Ezekutivu Eskola Sekundária Téknika Vokasionál, Grupu Teknólojia Indústria Becora, Francisco Guterres. Imajen TATOLI/Francisco Sony

Iha sorin seluk, Diretór Eskola ESTV Becora, Francisco Guterres, husu ba estudante sira atu partisipa másima iha semináriu ho vontade tomak, atu nune’e bele aproveita informasaun sira ne’ebé importante.

“Imi maka futuru nasaun, tanba ne’e tenke iha koñesimentu natoon kona-ba asaun brankamentu kapitál no finansiamentu terorizmu iha Timor-Leste. Tanba sensiblizasaun kona-ba informasaun hosi atus krimi rua ne’e ema hotu tenki hatene,” nia tenik.

Sensibilizasaun ne’ebé halo ba estudante hanesan informasaun jerál, ne’ebé la haree kursu no departementu ne’ebé estudante sira frekuenta hela.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here