Abitante iha mota-ibun Ponte Comoro III. Imajen Tatoli/Antonio Goncalves

DILI, 20 outubru 2021 (TATOLI)—Adjuntu Prezidente Autoridade Munisípiu Dili, António Moniz Calau, hateten semana oin autoridade munisípiu Dili sei halo sensibilizasaun kona-ba prevensaun dezastre naturál ba komunidade ne’ebé hela iha área risku, tanba atu prepera kondisaun hasoru fenómenu La Nina (udan no anin boot).

Notísia Relevante: Dezde setembru, SEPS alerta ona previzaun La Nina

“Semana oin, ita sei tun ba halo sensibilizasaun kona-ba prevensaun dezastre naturál ba komunidade ne’ebé hela iha área risku, ho objetivu atu fó hatene ba sira katak lakleur tan ita sei tama iha mudansa klimátika La Nina, liu-liu iha tempu udan ne’ebé besik monu rai atu sira prepara an,” António Moniz Calau hateten ba Agência Tatoli, via telefónika, kuarta ne’e.

Adjuntu PAM ne’e esplika, autoridade munisípiu Dili sei halo sensibilizasaun tanba haree ba iha tinan 2020 no 2021 komunidade barak mak afeta tebe-tebes ba dezastre naturál no to’o oras ne’e vítima balun sei hela iha sentru akollamentu iha Dili.

“Ho ida ne’e, ita-nia sensibilizasaun ne’e atu fanu sira-nia konsiénsia katak labele hela iha área ne’ebé mak risku. Aleinde ne’e, atu fó hatene ba sira referénsia mak iha tinan 2020 no 2021 ne’ebé ita hasoru ona dezastre naturál,” nia dehan.

Nia hateten, maske iha tinan 2021 ne’e autoridade munisípiu Dili halo sensibilizasaun ba komuniddae maibe komunidade la fiar nafatin no to’o ikus ema barak sai vítima ba dezastre naturál.

Tanba ne’e, nia dehan, autoridade Munisípiu Dili sei fó informasaun ba administradór postu administrativu no autoridade lokál sira, atu nafatin hatutan informasaun ba komunidade hodi tau atensaun ba dezastre naturál ne’ebé sei mosu mai.

Entretantu, iha sensibilizasaun ne’e autoridade munisípiu Dili sei hala’o ba komunidade ne’ebé hela iha área risku hanesan hela iha foho lolon, mota ibun no tasi ibun.

Notísia Relevante: SEPS no parseiru hahú prepara kondisaun hasoru fenómenu La Niña

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here