Reitór UNTL, João Soares Martins. Imajen Tatoli/Egas Cristóvão.

DILI, 19 outubru 2021 (TATOLI)—Reitór Universidade Nasionál Timor Lorosa’e (UNTL), João Soares Martins, informa UNTL hala’o hela revizaun ba planu estratéjiku periódu tinan 2021-2030.

“Ohin, informa ba Prezidente Repúblika kona-bá ami halo hela revizaun ba planu estratéjiku UNTL 2021-2030,” Reitór UNTL, João Soares Martins, hateten ba jornalista sira hafoin ramata sorumutu ho Prezidente Repúblika (PR), Francisco Guterres ‘Lú-Olo’, iha Palásiu Prezidensiál Nicolau Lobato, Bairru Pite, Dili, tersa ne’e.

Revizaun ne’e ho baze ba Planu Estratéjiku Dezenvolvimentu Nasionál (PEDN) 2011-2030 no Objetivu Dezenvolvimentu Sustentavel (ODS).

Nia hato’o ba Prezidente Repúblika (PR) bele hatutan ba Governu no Parlamentu Nasionál hodi apoiu UNTL liu-liu finansiamentu tuir programa kada tinan ne’ebé iha, hodi hadi’a melloramentu ensinu, melloramentu peskiza ho servisu komunitáriu.

“Prezidente hanesan mós alumni estudante UNTL nian no fó apoiu tomak ba universidade ninia planu no akompaña nafatin UNTL nia andamentu,” nia dehan,

Aleinde ne’e, nia informa, kona-bá atu simu estudante foun 2022 nian komisaun asesu ensinu superiór ekipa konjunta lidera hosi Ministériu Ensinu Superiór Siénsia no Kultura (MESK) no UNTL  rasik halo hela diskusaun. 

Haree ba kondisaun ka kapasidade ba aula no númeru manorin-na’in tuir trajetu ne’ebé universidade públika ne’e, prepara ona vaga ba estudante finalista sekundária hamutuk kuaze 3000 iha tinan oin maibé ba Governu bele aumenta tan uitoan.

Daudaun ne’e UNTL rejistu estudante 40.000 no profesór 400, hodi halo ona esforsu aumenta sala-de-aula atu bele responde ba nesesidade.

Espera dezenvolvimentu ba infraestrutura kontinua husu Governu bele apoiu nafatin, nune’e bele atinje kualidade ensinu superiór ne’ebé tuir vizaun UNTL sai sentru exellente.

Durante periódu COVID-19, prosesu aprendizajen iha universidade ne’e la’o mezmu aplika de’it ensinu distánsia ka online la kobre hotu hodi mantein nafatin ho estudante sira.

Biban ne’e, reitór UNTL ho estrutura foun kumprimenta mós Xefe Estadu ba mandatu foun ne’ebé antes ne’e simu ona pose.

Jornalista : Nelson de Sousa

Editór      : Cançio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here