UNESCO no MEJD realiza formasaun ba profesór siénsia kona-ba maneira hanorin via virtuál, iha salaun edukasaun munisípiu Viqueque, tersa (19/10). Imajen TATOLI/Vitorino Lopes da Costa

VIQUEQUE, 19 outubru 2021 (TATOLI)–United Nations Educational, Scientific and Cultural Organization (UNESCO) hamutuk ho Ministériu Edukasaun Juventude no Desportu (MEJD), iha tersa ne’e, kapasita profesór Ensinu Báziku Sentrál (EBC, sigla portugés) sira hamutuk-15 kona-ba maneira hanorin virtuál iha munisípiu Viqueque, durante loron-ida.

“Kapasitasaun virtuál ba profesór sira ne’e, ninia objetivu prinsipál atu lori profesór área siénsia hodi koñese no transmite ensinu ho maneira virtuál, oinsá uza kámara no seluk tan,” Reprezentante UNESCO, Nivia dos Santos Cristovão, informa, ba Agência TATOLI, iha salaun edukasaun munisípiu Viqueque, tersa ne’e.

Iha kada EBC 15 delega profesór ida, tanba ne’e iha futuru profesór sira ne’ebé seidauk tuir atividade ne’e sei hetan oportunidade hanesan.

“Espera ba oin, profesór sira hatene ona uza vituál ba área siénsia iha eskola sira iha munisípiu Viqueque,” nia akresenta.

Programa ne’e hetan suporta hosi Korea International Cooperation Agency (KOICA), ho apoia hosi UNESCO hodi realiza programa ne’e iha territóriu laran.

Iha fatin hanesan, Diretór Edukasaun munisípiu Viqueque, Emidio Amaral, agradese ba inisiativa UNESCO.

“Kapasitasaun ne’e ba maluk profesór sira iha ensinu báziku, ne’ebé hanorin liuliu kona-ba siénsia. Ita hahú hosi siénsia atu muda ita-nia rain no nasaun liuhosi siénsia,” nia dehan.

Tanba ne’e, Diretór Servisu Munisipál ne’e husu ba profesór sira atu tau atensaun másimu hodi simu matéria sira, nune’e bele implementa iha ida-idak ninia eskola sira.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here