Xefe Departamentu ba Planu Jestaun Ambientál iha Sekretaria Estadu Ambiente (SEA), Arlindo Silveira. Imajen Agência TATOLI/Natalino Belo.

BAUCAU, 19 outubru 2021 (TATOLI) – Sekretaria Estadu Ambiente (SEA) liuhosi diresaun ambiente hala’o formasaun kona-ba jestaun lixu-plástiku ba estudante ensinu báziku no sekundária iha munisípiu Baucau.

Objetivu formasaun refere atu hasa’e koñesementu estudante sira relasiona ho lixu-plástiku ne’ebé impaktu ba ambiente no saúde.

“Agora daudaun ita halo hela formasaun ba estudante sira ensinu báziku no sekundária sira-ne’ebé envolve hosi estudante hotu-hotu, liuliu sira-ne’ebé besik iha munisípiu Baucau laran tomak,” Xefe Departamentu ba Planu Jestaun Ambientál hosi Sekretaria Estadu Ambiente (SEA), Arlindo Silveira,  ko’alia iha salaun enkontru munisipál, tersa ne’e.

Arlindo esplika, formasaun refere foka liubá oinsá atu halo jestaun ba lixu plástiku ne’ebé oras ne’e sai nu’udar problema territóriu nasionál.

Daudaun ne’e, SEA hahú hala’o sensibilizasaun no kampaña zero plástiku ba estudante iha Timor-Leste laran tomak antes kontinua ba autoridade lokál sira.

“Kampaña dahuluk ita hala’o iha Ermera no daruak iha Baucau no sei kontinua ba beibeik,” Arlindo akresenta.

Nia dehan, atu atinje polítika zero plastiku, bele mós liuhosi formasaun, rekruta mós pesóal iha kada suku nain-rua ne’ebé mak hala’o kna’ar rekolla lixu plástiku hodi kontinua enkamiña ba kompañia ne’ebé sei halo resiklajen no fahe informasaun kona-ba soe lixu plastiku iha fatin-lixu.

Daudaun ne’e, munisípiu ne’ebé sai pilotu mak ne’ebé Dili hanesan postu admistrativu Atauro no suku Vila Verde, postu admistrativu Vera Cruz no sei kontinua mós iha Baucau no munisípiu seluk.

“Ita planu iha tinan oin sei implementa iha Baucau tanba populasaun barak entaun lixu mós barak,” Arlindo argumenta.

Tuir observasaun Agéncia TATOLI iha munisípiu Baucau, kauze loja no kioske kiik sira hahú la utiliza ona saku plástiku durante atividade ekonomia kada loron.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here