Hermenegildo da Costa Tilman.

Husi:

Hermenegildo da Costa Tilman

Introdusaun

Situasaun pandemia Covid-19 hala’o buat hotu lakon ninia atmosfera ne’ebé mak di’ak durante ne’e. Nasaun barak mak luta hodi hasoru situasaun ne’e ho métodu ne’ebé maka la hanesan. Repúblika Demokrátika Timor-Leste (RDTL), la ses mos husi situasaun ne’ebé mak nasaun seluk hasoru kona-ba Covid-19. Husi situasaun ne’ebé mak iha daudaun sai afeitadu mos ba prosessu aprendizajen (eskola) iha rai laran.

Ita hatene katak edukasaun nu’udar fontes ida ne’ebé importante atu muda ema nia hanoin kona-ba saida mak nia la-hatene sai ba hatene. Nasaun ne’ebé maka avansadu presiza tebes edukasaun ne’ebé maka forte. Atu muda ema nia hanoin kona-ba hanoin ne’ebé intelejénsia presiza tebes edukasaun ne’ebé mak justu. Ho edukasaun ne’ebé maka forte forma ema nia hanoin ne’ebé di’ak hodi hadi’a no dezenvolve Nasaun ne’e rasik. Nasaun ne’ebé di’ak presiza edukasaun ne’ebé mak di’ak. Tanba ho edukasaun ne’ebé maka di’ak lori ema muda nia koñesementu (Knowledge), aumenta nia abilidade (Skill), valór (Value), fiar (Belief) ne’ebé mak loos. Edukasaun hanesan dalan ida ne’ebé mak presiza nafatin hala’o konstrusaun ida ba ema hodi muda hanoin ne’ebé kloot (la hatene) sai ba hatene (luan). Tuir dalan hanoin ne’ebé edukativu no konsiénsia.

Revolusaun industriál 4.0 mak saida

Dala-barak ita sempre rona saida maka revolusaun 4.0. termu ida ne’ebé maka agora dadauk populár hela iha era millennium ne’ebé maka nakonu ho teknolojia dijitál ou modernu.

Ita ko’alia loos de’it katak, iha Timor-leste barak mak seidauk hatene saida mak funsaun husi revolusaun 4.0. no nia influénsia ba edukasaun rasik. Ita sei hola parte hela iha lian-Indonézia karik dehan “ketinggalan jaman”. Antes atu hatene kle’an liu kona-ba sa ida mak revolusaun 4.0?

Revolusaun indústria hahú iha siklu 18, ne’ebé mak hamosu idea oinsá enerjia serbisu ema nian troka ho teknolojia mekániku. Depois revolusaun 1.0 mosu kedas revolusaun indústria 2.0 ne’ebé mak koñesidu enerjia (general fort) ho implementasaun eletrisidade hodi fasilita prosesu produsaun, ne’ebé dezenvolvimentu teknolojia sempre iha mudansa, maka hamosu revolusaun indústria 3.0 ne’ebé bele habadak distansia no tempu ne’ebé hanaran revolusaun dijitál maka hamosu kedas revolusaun indústria 4.0 ne’ebé mak foka liu ba implementasaun teknolojia modernu hanesan teknolojia fiber optic, artificial inteligent internet, bele dehan de’it teknolojia smartphone.

Iha revolusaun indústria 4.0, inovasaun sai hanesan xave importante hodi halo kompetividade ba produtu sira iha merkadu. Ho razaun ne’e, ensinu superiór sira iha Timor-Leste presiza kria kondisaun hodi prodús rekursu umanu ne’ebé iha kapasidade inovativu iha aspetu hanesan literasia ba dadus (big data) (Artificial Intellegent ). Ho sira ne’e hotu hodi halo mudansa globál ba hanoin ne’ebé maka modernu hodi muda ema nia hanoin ne’ebé maka kloot ba boot.

Oinsá ninian impaktu ba edukasaun

Hanesan iha leten husi sentidu revolusaun 4.0. hanesan mudansa optic (internet). Iha ita nia rai rasik agora daudaun ema hotu assesu ba internet. Husi internet ema bele hetan vantajen no desvantajen, tuir ida-idak ninian utilizasaun. Nu’udar fini ba nasaun, ita hatene katak eduksaun sai fatór ne’ebé maka importante tebes hodi muda atmosfera foun liuhusi ema nia koñesementu primitivu ba modernu.

Tuir matenek nain John Dewey nia hanoin: “Edukasaun mak prosesu ida hodi forma (hierarkis) formasaun fundamentál ne’ebé maka sai baze intelektuál no emosionalmente ba iha relasaun natureza no umanu.”

Husi fraze John Dewey ita bele halo analizasaun simplis katak edukasaun sai hanesan motorista ida ne’ebé maka presiza halo verifikasaun (renovasaun) tuir nia tempu hodi muda koñesementu pessoál kona-ba oinsá utiliza internet ho privadu ne’ebé mak loos no di’ak.

Profesor Konrad Kebung iha ninia livru “Filsafat itu Indah” hateten hanoin koerente katak hanoin tuir regra, hanoin ne’ebé loos no buka ninia posibilidade relasaun ho asuntu seluk. Konsisténsia sentidu katak iha hanoin/ideia ida nia laran no la iha kontradisaun ne’ebé hamosu konfuzaun. Konsisten, la fasil atu muda ou troka hanoin ka desizaun ruma (bele haree iha buku Filozofia Edukasaun: Pedro dos Santos: Tuir Aristóteles (384-322 m. K) Ema nia moris iha kapasidade pensamentu ne’ebé sai nu’udar funsaun prima iha vida rasionál no St. Tomas de Aquino (1225-1274) “Sensu nu’udar fonte koñesimentu”, “fiar katak koñesimentu hahú hosi sensu persepsaun”, “koñesimentu bele moris bainhira mundu ne’e rasik aplika ba iha esperiénsia sensu”.

Iha sorin seluk John Locke: teória tabula rasa; ema aprende buat ruma hodi esperiénsia loron-loron, ambiente sosiál, eskola no família. Francis Bacon: Métodu hanoin indutivu. Signifika katak hodi natureza ninia nakloke, ema bele aprende adota ka utiliza natureza hosi moris no aprende hosi ema seluk (Inayah, 2012).

Buat ne’ebé importante atu ema hotu bele hatene mak oinsá uza internet ho di’ak hodi ajuda estudante sira nia estudu ho di’ak. Tanba ho revolusaun industriál 4.0 buat hotu mudansa teknolojia mak manda. Buat hotu fasil tanba ida ne’e hanesan umanu presiza iha koñesementu psikolojia ne’ebé di’ak hodi uza tuir presiza atu nune’e nia vantajen bele fó valór ne’ebé di’ak ba futuru.

Iha pontu tolu ne’ebé mak presiza toma atensaun ba revolusaun industriál 4.0 kona-ba edukasaun nian maka hanesan tuir mai ne’e: Primeiru; sai hanesan fundamentál maka oinsá halo mudansa globál ba hanoin ne’ebé maka di’ak ba parte edukasaun ninia liu ba parte oinsá muda  atetude no hanoin ne’ebé mak luan kona-ba edukasaun rasik, Segundu bele hakadi no fó liberdade iha parte talentu, Terseiru tenki iha polítika ne’ebé maka di’ak hodi halo revolusaun ba métodu edukasaun nian liu-liu ba parte modelu estuda nian ne’ebé mak uza internet tuir ninian tempu (kebutuhan jaman).

Iha mos parte seluk presiza kria métodu ne’ebé maka di’ak hodi ajuda edukasaun iha Timor la’o di’ak liután. Buat ne’ebé presiza hatur hanoin hodi forma mak: tenki iha hanoin ne’ebé maka kritiku, kreativu no hanoin ne’ebé maka inovativu. Iha mos tipu ne’ebé independente ba parte komunikasaun nian, liuhusi servisu hamutuk no kolaborasaun iha grupu no mos mesak. Atu nune’e forma estudante sira sai independente iha prosessu aprendizajen nia-laran.

Atu forma ema sai ema presiza buat ne’ebé maka hanaran morál. Husi morál ne’ebé maka di’ak, bele muda ema nia koñesementu ne’ebé maka pasadu ba ohin-loron ne’ebé furak iha sosiedade-nian laran.

Karakter: aspetu psikolojia Vs optiic (Internet)

Tempu ohin loron ho mundu modernu internet (gadget) ne’ebé maka iha, buat ne’ebé maka ema presiza sempre iha. Pergunta mak ne’e oinsá ho forma umanu kona-ba psikolojia nian. Hanesan umanu ne’ebé maka forma husi elementu karakter (sifat), mentalidade (mentality), morál (ethict), seksualidade (sexuality), ambisaun, presiza kursu no mos presiza matéria ne’ebé mak di’ak hodi forma sidadaun ida nia hanoin ne’ebé mak pozitivu hodi uza internet sai hanesan parseiru ida hodi tulun no mos fó valór ne’ebé di’ak ba futuru rasik.

Tanba ita hatene katak, ho modernu internet, labarik ne’ebé maka ho idade kiik mos hatene ona uza youtube nst. Buat ne’ebé mak presiza ema hotu toma atensaun maka eduka ho morál ne’ebé mak di’ak (fó hanoin) ne’ebé maka umanizmu atu sira uza tuir dalan legál ne’ebé di’ak hanesan umanu ne’ebé mak morál. Ho metodolojia hanesan ne’e ajuda estudante sira hadi’a no haforti sira nia mentalidade liu-liu ba iha parte psikolojia nian ne’ebé mak di’ak no fó vantajen iha vida nomos estudu rasik.

Aspetu psikolojia fatór ne’ebé mak importante atu hodi muda ema nia memoria (primitivo), ba uza internet, sai ba ema ne’ebé mak modernu ho hanoin ne’ebé di’ak la’ós hodi estraga psikolojia án rasik.  Ho psikolojia forma ema tuir psykis ne’ebé mak umanu ho intelektual ne’ebé di’ak.

Estudante: Optic (internet) iha era pandemia Covid-19

Iha era pandemia covid-19 ne’e, buat barak mak parado (hapara), la organizadu. Husi buat barak ne’ebé maka la la’o kompostu mos prosessu aprendizajen (eskola) iha teritóriu laran rasik. Iha mídia ita asiste dehan eskola hotu tenki hala’o online. Pergunta mai ita atu husu planu no preparasaun oinsá husi ministériu edukasaun hodi halo estratejia ba eskola online. Basa ita hatene katak sosiedade (estudante) barak mak to’o ohin loron telefone de’it mos araska, osan ba pulsa mos la iha (fatór ekonomia). Ita labele bosok malu katak iha Timor laran ida dehan eskola online ne’e bele realiza tomak. Hakarak ko’alia loos de’it katak eskola online ne’e so ba sira riku nian oan bele, maibé oinsá ho estudante sira ne’ebé mak ekonomia sai problema.

Haree husi hanoin seluk, professores barak mos sei iha parte limited accses ba métodu uza teknolojia hanesan komputadór. Ida ne’e mos sai preokupasaun ba metodolojia estuda online rasik. Oinsá ho eskola online? Ne’ebé mak agora daudaun ne’e la’o ka lae?

Konkluzaun:

Iha enkontru APEC tinan 90-an ho reflesaun ne’ebé boot hodi foti desizaun katak globalizasaun ASEAN sei hahú iha tinan 2020. Tanba ida ne’e revolusaun industriál data rasik hahú ho revolusaun internet. Edukasaun iha pandemia covid-19 sai hanesan reflesaun boot ida ba edukasaun rasik oinsá prosesu aprendizajen? Ita fiar katak ho liafuan eskola online la’o ka la’e. Atau keta persuasivu de’it karik, tanba hakarak ka lakohi razaun polítika, pandemia halo prosessu aprendizajen la ativu iha aula.

Edukasaun presiza tebes iha nasaun ne’ebé mak hakarak forma nia ema sai genius, intelektuál no kreativu. Atu hadi’a nasaun ne’ebé mak di’ak presiza edukasaun ne’ebé mak forte. Filozofia edukasaun ninia meta prinsipál mak atu ema bele realiza-án iha ninia viajen moris, nune’e’e sai ema ne’ebé hatene ninia destinu no atinje objetivu lo-loos nu’udar ema. Tanba ne’e edukasaun ninia meta mak prepara ema atu sai ema ne’ebé ‘unidade’ (konfia-an, fiel, kompromete ho konsisténsia), armonia (hanoin no asaun iha balansu, kaer metin prinsípiu, la fasil muda ou troka hanoin) no dinámika (halo mudansa hosi simples ba kompleksu) tantu iha zona kognitivu, emosionál no espirituál. Nune’e’e sai ema ne’ebé krítiku, analizadór, refletivu no hatene lori-an iha kualker kondisaun.

Filozofia edukasaun halo reflesaun krítiku ba prosesu edukasaununiversal no perspetiva mundu kona-ba moris. Atu atinji ida-ne’e presiza iha konseitu edukasaun ne’ebé loos, estratéjia no metodolojia hanorin ne’ebé di’ak no relevante.

Tanba ida ne’e ita presiza hadi’a ita nia edukasaun liuhusi prosessu aprendizajen, mantein métodu kuantitativu no kualitativo ne’ebé mak di’ak hodi muda hanoin ne’ebé mak sai ba independente, umaniora, reflektivu, inovativu no kreativu.

Hakerek nain lisensiatura iha fakuldade filozofia no teolojia, Universidade Sanata Dharma, Yogyakarta-Indonézia.

PUBLISIDADEiklan

HAKEREK NO HATÁN

Please enter your comment!
Please enter your name here