Ekipa pesóal saúde hamutuk ho MTKI hala’o kampaña vasinasaun ba komunidade Baucau vila iha Vila Vova, tersa (19/10). Imajen Agência TATOLI /Natalino Belo.

BAUCAU, 19 outubru 2021 (TATOLI) – Ministériu Turismu, Komérsiu no Industria (MTKI) liuhosi asesór polítika ministériu refere enkoraja komunidade postu administrativu Baucau vila no Vemasse, hakbsesik ba sentru saúde simu vasina AstraZeneca.Objetivu hosi kampaña vasinasaun atu enkoraja populasaun sira hakbesik ba sentru saúde hodi simu vasina nune’e halo protesaun hasoru propagasaun surtu COVID-19.

“Progressu vasinasaun agora daudaun atinje ona 70% rezultadu hosi kampaña vasinasaun ida-ne’e,” Asesór Polítika hosi MTKI, Basílio Soares Marques ko’alia iha Vila Nova, tersa ne’e.

Basílio akresenta, durante destaka iha postu administrativu rua ne’e atu desimina informasaun katak governu hakarak komunidade partisipa másimu iha kampaña vasinasaun.

Nia husu komunidade sira lalika fiar issue ne’ebé lansa iha rede sosiál kona-ba impaktu vasinasaun ne’ebé hateten vasina bele hamate ema-nia vida.

“Di’akliu hakbesik-aan ba sentru saúde ne’ebé besik nune’e hetan vasinasaun hosi pesóal saúde,” Basílio fó hanoin ba komunidade.

Tuir dadus ne’ebé Agência TATOLI, asesu katak daudaun ne’e númeru partisipasaun kampaña vasinasaun iha Baucau vila hanesan iha sentru saúde Uailili doze dahuluk hamutuk 5.766 korresponde ho 61% no doze daruak 4.188 (44%) hosi suku haat, aldeia 28.

Sentru saúde Bucoli númeru partisipasaun kampaña vasinasaun doze dahuluk hamutuk 2.727 korresponde ho 97% no doze daruak 2.275 (81%) hosi suku 2, aldeia 10.

Sentru saúde Riamare doze dahuluk 12.867 (81%), doze daruak 9.325 (59%) hosi Suku 5, aldeia 27 no Hospital Referál Eduardo Xemenes (HorEX, sigla Portugés) doze dahuluk 1.051 no doze daruak 708.

Enkuantu postu administrativu Vemasse hanesan iha Sentru Saúde Vemasse númeru partisipasaun doze dahuluk 2.871 (89%), doze daruak 2.403 (74%) hosi suku 3, aldeia 9. Sentru saúde Ossoqueli doze dahuluk 2.235 (95%), doze daruak 1.659 (71%).

Entertantu totál komunidade Munisípiu Baucau ne’ebé partisipa iha kampaña vasinasaun doze dahuluk hamutuk 53.021 (72%), doze daruak hamutuk 36.671 (50%) hosi totál sentru saúde 10, suku 59, aldeia 281.

Komunidade ne’ebé seidauk vasina hamutuk 20.296, total alvu ema 73.317 hosi totál populasaun 89.693.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here