Kondisaun sentru integradu agrikultura ba agro-komérsiu iha área Raitahu Viqueque, kuarta (17/11). Imajen TATOLI/Vitorino Lopes da Costa

VIQUEQUE, 19 novembru 2021 (TATOLI)—Ministériu Agrikultura no Peska (MAP) halo koordenasaun ho Sekretaria Estadu Fomasaun, Profisionál no Empregu (SEFOPE) atu envolve formandu hosi sentru formasaun Beasu iha área konstrusaun, ba agro-komérsiu área Raitahu, suku Uma-uain kraik, postu Viqueque villa, munisípiu Viqueque.

“Joven ne’ebé tuir hela formasaun iha Beasu, sei halo karau-luhan, manu-luhan, no fahi-luhan, inklui sei halo mós sentru ida. Tanba ne’e, ba oin kona-ba konstrusaun, ita-nia formandu SEFOPE sei responsável, enkuantu ba área agrikultura, povu agrikultór maka sei serbisu,” Diretór Servisu MAP Viqueque, Carlos Pinto, hateten ba Agência TATOLI, sesta ne’e.

Notísia relevante: Atividade iha sentru agro-komérsiu Raitahu Viqueque hahú dezembru ne’e

Daudaun ne’e seidauk envolve sira tanba halo hela lutu, maibé iha fulan-dezembru ne’e hahú envolve ona atu halo konstrusaun.

Iha fatin seluk, Diretór Servisu SEFOPE Viqueque, Simões da Silva, hateten foin lalais Sekretaria Estadu halo ona kooperasaun ho MAP, ne’ebé atu envolve formandu sira iha Beasu atu kaer konstrusaun iha sentru agro-komérsiu Raitahu.

“Foin lalais ami-nia Diretór Jerál SEFOPE no MAP halo ona kooperasaun atu envolve formandu sira serbisu hotu iha sentru Raitahu, maibé sira prioridade liu ba área konstrusaun,” nia akresenta.

Daudaun ne’e, formandu iha área formasaun ba konstrusaun jerál hamutuk na’in-60, maibé na’in-rua sai, ne’ebé hela na’in-58 mak agora tama faze estájiu.

“Agora depende ba demanda MAP, bainhira presiza joven sira iha área konstrusaun na’in hira maka bele hato’o hafoin ami aloka joven sira,” nia tenik

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here