Membru Unidade Polisia Fronteira (UPF) no FALINTIL Forsa Defeza Timor-Leste (F-FDTL) blokea estrada iha área Postu Administrativu Tilomar hodi evita abitante sira halo viazen hosi Suai ba Fatumea.Imajen/Tatoli/Eugénio Pereira

COVALIMA, 19 outubru 2021 (TATOLI)—Reprezenta Komando Jeral PNTL, Armando dos Santos, husu ba Komunidade Suku Kasabauk, postu administrativu Tilomar, munisípiu Covalima kumpre Governu nia programa. 

“Ha’u husu ba ita hotu atu respeita Governu nia programa. Moras COVID-19 ne’e problema mundiál ka inimigu invisível, tanba ita la haree-hetan. Ita nia autoridade lokál no to’o nasional, ita labele sama ita-nia dignidade,” Armando dos Santos apela liuhosi nia diskursu bainhira hamutuk ho Vise-Ministru Interiór, António Armindo, realiza kampaña vasinasaun iha suku Kasabauk, postu administrativu Tilomar, Covalima, tersa ne’e. 

Nia husu ba sidadaun sira labele hakat liu fronteira ba Indonézia liuhosi dalan ilegál maibé tenke dalan legal.

“Ita bo’ot sira iha fronteira tenke apoiu seguransa no fiar autoridade lokál. Ita moris iha nasaun ida la fiar ita-nia autoridade, ita-nia patriotizmu mihis ba beibeik,” nia dehan. 

Husu ba sdadaun sira labele fiar informasaun falsu iha li’ur maibé tenke fiar autoridade lokál no  joven sira Covalima-oan tenke hamutuk atu dezenvolve munisípiu Covalima.  

Administrador Postu Administrativu Tilomar, José Fatima Xavier, hatutan durante Governu realiza kampaña vasinasaun atu komunidade kontribui hodi simu vasina mibé dalabarak komunidade rona liuu fali informasaun falsu sira hosi ema ne’ebé responsabilidade laek. 

“Ita hotu hatene, membru Governu sira-nia prezensa iha munisípiu Covalima halo kampaña vasinasaun atu disemina informasaun kona-ba importánsia hosi vasinasaun, ranba durante ne’e ita fiar liu mak informasaun falsu,” nia dehan. 

Suku Kasabauk kompostu hosi aldeia Coloama, Cawauman no Tabolo ho totál populasaun hamutuk 2,331, ho totál feto 1180 no mane 1150.

PNTL kontinua halo “check point” iha pontu entrada

Entretantu, Komandante PNTL Munisípiu Covalima, Superintendente António de Sa, hateten Polisia Nasionál Timor-Leste (PNTL) kontinua halo “check point” iha pontu entrada sira atu kontrola sidadaun sira tama-sai ilegál, hodi prevene transmisaun COVID-19.

Nia dehan, atividade “check point” ne’ebé seguransa liuhosi Polísia Unidade Tranzitu hala’o ne’e liga ho lei kódigu estrada hanesan transporte sira-ne’ebè laiha xapa matríkula, la uza kapasete, liaha karta kondusaun no seluk tán. 

Check point konjuntu entre F-FDTL no polisia espesial ne’e hodi kontrola atividade ilegál sira,  lei arma branka. Ita halo surpreza konjuntu, UPF no Unidade Espesiál no task force sira halo operasaun konjuntu ba kazu atividade ilegál sira no dekretu-leu númeru 5/2017, kona-ba lei arma branka, ita halo hanesan surpreza tanba sira iha liña afastada sira tenke halo pasa revista,”  Superintendente António de Sa informa, iha suku Lalawa, postu administrativu Tilomar, munisípiu Covalima, tersa ne’e. 

Liuhosi check point iha pontu entrada sira, dala barak sira kaptura sidadaun sira hala’o atividade ilegál sira tanba bazea ba esperiénsia hatudu katak kazu COVID-19 importaduu hosi nasaun  viziñu Indonézia tanba sidadaun sira liuhosi dalan ilegál. 

“Ita iha forsa rua mak destaka iha fronteira. Ita halo kooperasaun trilaterál, hanesan imediata, afastada próxima halo liu hosi Unidade Espesial (UPM), forsa defeza inklui eskuadra sira iha postu administrativu Fatumea, Fatululik no Tilomar, ho objetivu atu kontrola ita-nia sidadaun Suai-oan no ba sidadaun estranjeiru sira tama mai no halo atividade ilegal sira,” nia dehan. 

Iha Covalima komunidade sira nia karau lakon, ai-kameli liuhosi operasaun konjunta no pasa revista bele kaptura sidadaun sira.

Tuir Agência Tatoli nia observasaun nota katak, durante ne’e iha terrenu, Polísia Nasionál Timor-Leste hamutuk ho pesoál saúde halo pasa revista iha pontu entrada sira, hanesan parte Tafara, Lokeu, Ogues no seluk tán hodi verifika kartaun vasinasaun.

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here