Governu Austrália liuhosi UNICEF entrega veikulu hamutuk 21 ba Ministériu Saúde, Iha Kampaun UN, tersa (19/10). Imajen Tatoli/Francisco Sony

DILI, 19 outubru 2021 (TATOLI)— Governu Austrália liuhosi Fundu Nasaun Unida ba Labarik (UNICEF, sigla Inglés), entrega karreta unidade 21 ba Ministériu Saúde atu apoia serbisu imunizasaun iha nivél nasionál to’o munisípiu sira.

Embaixadór Austrália iha Timor-Leste, Peter Roberts, hateten apoiu karreta unidade 21 ho marka Toyota Hilux atu fasilita Ministériu Saúde halo monitorizasaun no supervizaun  ba imunizasaun  no materidade  ba bebé foin moris, programa  saúde infantil no distribuisaun produtu saúde husi nivel  munisípiu ba sentru saúde primária sira.

Embaixadór Austrália iha Timor-Leste, Peter Roberts. Imajen Tatoli/Francisco Sony

“Ha’u orgullu no kontete tanba bele entrega veíkulu 21 ba Ministériu Saúde hodi apoia atividade imunisasaun ba munisípiu inklui Rejiaun Adeministrativu Espesiál Oé-cusse no Ambeno (RAEOA), inklui apoia SAMES ba  programa imunizasaun nasionál,’’ Embaixadór Austrália ne’e hateten liuhosi diskursu seremonia entrega karreta 21 ba MS, iha kampaun UN-Caicoli, tersa ne’e. 

Governu Austrália entrega mos ekipamentu médiku ba Servisu Autonómu Medikamenntu no Ekipamentu Saúde (SAMES, sigla Portugés), atubele tulun profesionál Saúde sira halo atendementu ba pasiente COVID-19 sira ho di’ak no susesu.

“Ami espera katak apoia hirak ne’e bele tulun tebes ba Ministériu Saúde hodi haforsa Sistema Saúde liuliu hasa’e korbertura imunizasaun iha Timor Leste,’’Diplomata ne’e espera.

Governu agradese Austrália-UNICEF

Ministra Saúde, Odete Maria Freitas Belo agradese Governu Austrália no UNICEF ne’ebé mak apoiu mellora Sistema Saúde iha Timor-Leste.

Ministra Saúde, Odete Maria Freitas Belo. Imajen Tatoli/Francisco Sony

“Governu Austrália no UNICEF apoiu karreta ba ita hodi hala’o serbisu esensiál sira hanesan atu transporta vasina sira to’o iha munisípiu ne’ebé mak ita planeia ona no apoia imunizasaun maternidade iha munisípiu sira,’’ Ministra Saúde agradese.

Ministériu Saúde sei koloka karreta toyota hilux 15 ba apoia programa imunizasaun no maternidade ba bebé foin moris no programa saúde ba labarik iha nasionál no Munisípiu 12 inklui RAEOA.

Alende ne’e, sei koloka karreta ida ba SAMES liuhosi kaixa ferramentu ba Departamentu Biomedikal nivel nasional hodi apoia vasina no distribuisaun produtu sira relasiona ho saude, formasaun, supervizaun no monitorizasaun.

Entretantu, karreta truck box Mitsubitshi lima sei apoia ba armazen serbisu saúde rejionál kona-bá distribuisaun produtu farmaseutiku ba fasilidade sentru saúde sira.

Governu Austrália apoia fundu liuhosi UNICEF halo akizasaun ba karreta 21 ho kustu $872.500.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here