Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho lia-na’in suku Usistasa’e, hahú aplika regulamentu tara-bandu. Imajen Agência TATOLI/ Abílio Elo Nini.

OÉ-CUSSE, 19 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Agrikultura, identifika tán bee-matan hamutuk 27 iha faze daruak atu halo konservasaun iha tinan 2021.

Sekretáriu Rejionál Asuntu Agrikultura, José Eta, informa, tinan 2020 liubá Oé-Cusse enfrenta krize bee-moos, kuaze suku hotu-hotu bee-matan sira maran.

Nune’e Sekretaria Rejionál ba Asuntu Agrikultura serbisu hamutuk ho parseiru Organizasaun Naun Governamentál (ONG) lokál sira hanesan World Neighbor (WN), ONG Centro Educação Sívica Enclave Oé-cusse (CECEO), ONG Binibu Faef Nome (BIFANO) konsege identifika tán bee-matan 27 iha suku-10 atu halo konservasaun proteje bee-matan hirak-ne’e.

Iha faze dahuluk, Autoridade RAEOA identifika ona bee-matan 58 no daudaun ne’e halo ona konservasaun iha suku 14 kobre aldeia 32 ho ektare 100,99.

“Iha faze daruak ne’e ita identifika tán bee-matan 27 iha suku 10 ho nia área ektare sei iha prosesu nia laran,” Sekretáriu Rejionál ba Asuntu Agrikultura, José Eta, informa ba Agência TATOLI, iha Oé-Cusse, tersa ne’e.

Suku 10 ne’ebé identifika iha faze daruak ne’e maka hanesan, iha sub-rejiaun Nítibe iha suku Ban-Afi, aldeia Kuanobe, bee-matan Oé-Liso, aldeia Neofmetan bee-matan Oél-Puan, suku Usitaco, aldeia Oamná bee-matan Oél-Fatubena.

Purtantu, iha sub-rejiaun Oésilo iha suku Usitasa’e, aldeia Sifin, bee-matan Oél-Busi, aldeia Buqui bee-matan Oél-Ekam, aldeia Pune, bee-matan Oél-Nakome, suku Usitaqueno, aldeia Nibin, bee-matan Oél-ko’e.

Suku Bobometo, aldeia Nonquican, bee-matan Oél-Naheten, bee-matan Oél-Lilis, bee-matan Oél-Kabun, bee-matan Oél-Kbat no aldeia Oébaha bee- matan Oél-Fisok.

Iha sub-rejiaun Pásabe, suku Abani, aldeia Usapin, bee-matan Oél-Colo, bee-matan Oél-Faot’esu, bee-matan Oél-Atpene, bee-matan Oél-Alik, bee-matan Oél-Nuncolo, bee-matan Oél-Bisese, bee-matan Oél-Huabu’af, suku Malelat, aldeia Malelat, bee-matan Oél-Hueknutu.

Iha sub-rejiaun Pante Makassar, suku Cunha, aldeia Noe-Ninen, bee-matan Oél-Nontokof, suku Bobokase, aldeia Fatubija’e, bee-matan Oél-Nekmeu, suku Taiboko, aldeia Ulas, bee-matan Oél-Upun no bee-matan Oél-Uf.

“Bee-matan hirak-ne’e iha suku-10 kobre benefisiáriu hamutuk 2.282, entaun autoridade prepara ona foos saku 4.564 atu distribui ba sira tanba komunidade ho voluntáriumente entrega sira-nia kintál, balu atu halo konservasaun ba bee-matan hirak-ne’e, inklui halo lutu haleu no kontinua ba tara-bandu,” nia fundamenta.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here