Xefe suku Fatubossa, Mateus Xavier Mendonça. Imajen TATOLI/Arminda Fonseca

AILEU, 19 outubru 2021 (TATOLI)—Aldeia Caicasa, Erhetu, Hoholete, no Urhua, iha suku Fatubossa, postu administrativu Aileu villa, munisípiu Aileu, seidauk asesu ba liña eletrisidade.

“Aldeia haat ne’e iha uma-kain 300-resin, ne’ebé desde Timór restaura independénsia to’o agora seidauk asesu ba liña eletrisidade,” Xefe suku Fatubossa, informa ba Agência TATOLI, iha Merkadu Daisoli, Aileu, tersa ne’e.

Suku Fatubossa ho abitante hamutuk 2.370, hosi uma-kain hamutuk 550, iha aldeia hitu, ne’ebé aldeia Fatubossa, Liclaucana, no Coulau asesu ona liña eletrisidade maibé haat seluk mak seidauk.

“Ba komunidade ne’ebé seidauk asesu liña eletrisidade iha tempu kalan, balun iha kbiit hola solar panel, maibé seluk ne’ebé laiha kbiit kontinua uza lampu tradisionál hanesan tuku kamii hodi uza,” nia akresenta.

Notísia relevante: EDTL, E.P deside re-anunsia konkursu instala eletrisidade pakote 30

Líder komunitáriu hato’o ona preokupasaun ne’e ba parte kompetente maibé to’o agora seidauk iha rezultadu.

“Husu ba Governu, planu ne’ebé iha ona katak antes ramata mandatu VIII Governu, komunidade iha territóriu Timór laran bele asesu hotu eletrisidade ne’e tenke realiza, tanba se lae bele difikulta labarik estudante sira atu estuda iha tempu kalan,” nia hateten.

Aleinde ne’e, kondisaun estrada ligasaun hosi Aileu villa bá suku Fatubossa to’o aldeia tolu ho kondisaun a’at, ne’ebé difikulta movimentu abitante iha tempu udan.

“Estrada ligasaun ba aldeia Caicasa, Erhetu no Urhua, ho distánsia kilómetru sia, Governu presiza hadi’a lalais, tanba tempu udan difikulta tebes movimentu ema no transporte, liuliu ba labarik estudante sira tanba atu ba aldeia tolu ne’e tenke hakuur mota, tanba ne’e Governu tenke ajuda lalais tanba tempu udan mós besik ona,” nia fó hanoin.

Bainhihra Governu hadi’a ona dalan, sei fó benefísiu ba komunidade tanba aldeia tolu riku ho produtu lokál hanesan, liis-asu, liis mean, senoura, fehuk ropa, ervilla no repollu, ne’ebé produtór sira esforsu hodi lori ba merkadu munisipál to’o nasionál.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here