Sinál tránzitu ne'ebé ho pozisaun iha trotoár leten no kondisaun ne’ebé ladi’ak ona. Imajen Agência TATOLI/Sérgio da Cruz.

BOBONARO,18 outubro 2021 (TATOLI)— Diresaun Transporte Terrestre (DTT) munisípiu Bobonaro, fó-sai karak sinál tránzitu iha Maliana barak la funsiona no oras ne’e planeia atu instala 235 nune’e asegura ema-nia vida iha estrada públiku.

Diretór DTT Munisípiu Bobonaro, José Paulo Henrique Baptista, informa sinál sira-ne’e kompostu hosi tipu sinál informasaun, bandu no obrigatóriu.

“Ami identifika hahú kedas hosi estrada nasionál to’o kapitál munisípiu, sinál lubuk ida mak nia kondisaun ladi’ak ona, tanba heta estragu hosi ema deskoñesidu no dezastre naturál, tanba ne’e ita planeia atu instala foun no halo manutensaun hamutuk 230-resin, maibé ida-ne’e depende ba orsamentu iha tinan oin governu tau iha prioridade ka lae,” nia ko’alia iha Maliana, segunda ne’e.

Nia haktuir, presiza duni halo manutensaun tanba iha estrada públiku sinál tránzitu mak kompleta estrada hodi bele garante seguru ba ema no trasporte públiku nia movimentasaun.

Bainhira DTT Bobonaro implementa planu ne’e, sei koordena ho Ministériu Obra Públika liuhosi diresaun ponte no estrada halo servisu integradu nune’e obra hosi parte rua ne’e bele la’o pakote ida de’it.

“Ba sinál tránzitu sira atu inatala foun ne’e ami prepara ona mapamentu, maibé ita tenke serbisu hamutuk, sé lae ita monta sinál, aban bainrua loke tán estrada foun ida sobu sai hotu sinál sira-ne’e, dalaruma sinál balu mós bele iha trotoár leten, tanba ita laiha koordenasaun no komunikasaun di’ak,” nia esplika.

Realidade hatudu sinál balu ne’ebé antes ne’e instala ona iha área rotunda Maliana ba to’o iha parte merkadu laran, sinál tipu bandu no informasaun besik sanulu mak ninia pozisaun iha fali kalsadas nia leten.

“Ida-ne’e ema barak mak lamenta duni, maibé ami sei halo koordenasaun serbisu ho autoridade munisípiu no parte relavante sira atubele hadi’a, sé la impede ema la’o-ain tanba iha fali trotoár leten,” nia katak.

Nia husu komunidade munisípiu Bobonaro labele estraga sinál tránzitu tanba funsaun atu eduka utente rodoviáriu sira, la’o-tuir regra kódigu estrada, hodi minimiza asidente tráfegu ba trasporte públiku no privada sira.

Sinál tránzitu iha kapitál Maliana hamutuk 40 maibé hosi kuantidade ne’e barak la funsiona ona no balu kondisaun la permite.

Tuir observasaun Agência TATOLI nota katak, iha kapital Malian kondisaun zebra croos, hosi rotunda Maliana ba to’o iha Soso a tinta lakon hotu ona, no iha edifísiu públiku barak nia oin la eziste ona.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here