Administradór Munisísipiu Viqueque, Januário Soares ‘Boly’ entrega fundu estímulu empreendedorizmu sosiál ba grupu benefisiáriu, iha Sentru Juventude Viqueque, segunda (18/10). Imajen TATOLI/Vitorino Lopes da Costa

VIQUEQUE, 18 outubru 2021 (TATOLI)–Sentru Juventude Viqueque (SJV), iha segunda ne’e, lansa apoiu fundu estímulu empreendedorizmu sosiál etapa dahuluk, ba grupu juventude hamutuk 29 iha munisípiu Viqueque.

Tuir Diretór Ezekutivu SJV, Luís Sarmento, hateten, programa ne’e hosi Sekretaria Estadu Juventude no Desportu (SEJD), ne’ebé kria polítika nasionál ba juventude ne’ebé maka haree liu ba juventude edukasaun, moris saudável no empreendedorizmu.

“SEJD esforsu implementa polítika sira ba ita-nia juventude sira, ne’ebé ba fundu empreendedorizmu ita simu proposta hamutuk 54, maibé hafoin halo analiza no selesaun ita hetan 29. Tanba ne’e, ohin ita entrega fundu ba grupu sira,” Diretór Ezekutivu SJV hateten iha seremónia lansamentu fundu iha Sentru Juventude Viqueque, segunda ne’e.

Fundu ne’e entrega diretamente hosi Administradór Munisípiu Viqueque, Januário Soares ‘Boly’ ba Responsável kada grupu benefisiáriu.

Nune’e, Responsável sentru espera fundu ne’e bele prodús buat ruma, tanba ne’e grupu benifisiáriu tenke atensaun no kumpre ba atividade mensiona iha proposta.

“Ita elemina proposta haat no proposta 21 sei iha faze avaliasaun,” nia akresenta.

SEJD aloka fundu ba atividade ne’e hamutuk $550.000 ho alvu ba grupu hamutuk 700 resin, ne’ebé kada grupu benefisáriu hetan $750.

Grupu joven ne’ebé partisipa programa ne’e, mai hosi postu lima hanesan Viqueque villa iha grupu hamutuk 15, Ossu iha grupu rua, Lacluta iha grupu neen, Uatucarbau grupu haat no Uatulari grupu rua.

Iha fatin hanesan, Administradór munisípiu Viqueque, Januário Soares ‘Boly’, husu joven benefisiáriu sira bele responsabiliza fundu, nune’e bele atinje objetivu.

“Ho fundu ne’ebé imi hetan, tenke koko halo buat ruma, importante maka ita-boot sira tenki implementa negósiu ho di’ak,” nia enkoraja.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here