Reprezentante komunidade Lautém hasai retratu hamutuk hafoin halo audiénsia ho Prezidente Republika, Francisco Guterres Lú Olo iha Palásiu Prezidensiál Nicolau Lobato Bairru Pite, Dili. Imajen/Mídia PR.

DILI, 18 outubru 2021 (TATOLI)—Prezidente Repúblika (PR), Francisco Guterres ‘Lú-Olo’, rona preokupasaun hosi reprezentante komunidade munisípiu Lautém kona-bá infraestutura bázika ne’ebé Estadu presiza tau matan.

Prezidente Repúblika hateten, sei hato’o komunidade Lautém nia preokupasaun ba Governu liuhosi audiénsia regulár semanalmente ho Primeiru-Ministru (PM) atu hatán ba estrada barak mak sei aat, falta eletrisidade ba aldeia 22, eskola aat, menus pesoál saúde iha postu sira no desmobilizasaun veteranu.

“Ita hotu-hotu tenke rekoñese ba saida mak halo no seidauk halo atu nune’e bele fó korajen atu hadi’ak liután ba interese povu nian, lori moris di’ak ba povu,” Xefe Estadu Francisco Guterres Lú Olo hateten liuhosi nota ne’ebé Agência Tatoli asesu, segunda ne’e.

Ministériu Edukasaun Juventude no Desportu (MEJD) iha tinan ne’e hahú halo ona reabilitasaun ba eskola no aumenta sala-de-aula iha eskola sira iha Timor-Leste laran tomak hodi hatán ba preokupasaun sidadaun nian, la’ós de’it iha iha munisípiu ida maibé iha munisípiu hotu-hotu.

Xefe Estadu hateten, buat barak halo tiha ona, buat balun seida’uk halo no hein ba oin bele realiza.

Portavoz Reprezentante Komunidade Lautém, Tomas Pinto, husu ba PR atu hatutan sira-nia lian ba Primeiru-Ministru atu nune’e ba oin bele hatán komunidade Lauté nia preokupasaun ba ema hotu nia di’ak.

Jornalista : Nelson de Sousa

Editór      : Cançio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here