Imajen/Mídia PR.

DILI, 18 outubru 2021 (TATOLI)—Prezidente Repúblika (PR) liuhosi Xefe kaza Sivil, Francisco Maria de Vasconcelos, segunda ne’e fó apoiu materiál konstrusaun no roupa ba família vítima inséndiu eis merkadu Comoro iha fulan-jullu tinan 2021.

Notísia Relevante: MS fahe pakote ijiene 680 ba vitima inséndiu Comoro

“Prezidente Repúblika hanoin tebes oinsá atu tulun ita boot sira, tanba ne’e Prezidénsia Repúblika fó tulun balun, maske ne’e responsavél tomak Governu nian,” Xefe Kaza Sivil ne’e hato’o ba vítima inséndiu liu hosi nota ne’ebé Agéncia Tatoli asesu.

PR hanesan aman ba povu tomak nune’e buka meiu oinsá mak tulun família vítima hodi rekupera hadia hela fatin.

“Ajudu ida ne’e hanesan forma ida PR nia responsabilidade, nia domin ba ita-boot sira. Maske la barak, maibé importante la’ós sasan ne’e, importante mak ita-nia relasaun, ita-nia domin no hanesan umanu, hanesan aman no oan sira,” nia hateten.

Xefe Kaza Sivil fó hanoin ba autoridade atu kordena ho Governu liuhosi dirasaun Bombeiros atu bele hala’o edukasaun sivika ida oinsá atu hasoru inséndiu, tanba komunidade eis merkadu Comoro afeta ona inséndiu ba dalarua.

Tuir lista ne’ebé mak iha, família hamutuk 217 mak simu apoiu hanesan simentu saka 657, besi kotak hamutuk 1752, baut kalen kaixa 438 no roupa eskola nian hamutuk 219.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here