Membru PCIC transporta Ajente Xefe Polísia inisiál FSC ne'ebé uza jaket metan ba Prizaun Gleno hodi kumpre pena prizaun, iha edifísiu PSIC, segunda (18/10). Imajen Tatoli/Francisco Sony

DILI, 18 outubru 2021 (TATOLI)- Polisia Sientífika Investigasaun Kriminál (PCIC sigla portugés), ezekuta mandadu Tribunál Distritál Dili (TDD) hala’o buska no apreensaun ba feto ida nuudar Ajente Xefe polísia ho inisiál FSC iha rezidénsia Surikmas-Dili, sesta (16/10).

“Ami halo buska no apreensaun ba Ajente Xefe Polísia ne’e iha sesta feira (15/10), purvolta 14:00, loraik, iha nia rezidénsia Surikmas, Dili. Agora daudaun FSC iha ona ami nia fatin, hafoin transporta ba prizaun Gleno hodi kumpre pena prizaun tinan haat,” Portavoz PCIC, Octávio da Costa Araújo, hateten ba jornalista sira iha knaar fatin-Caicoli, segunda ne’e.

PCIC transporta membru PNTL feto ida ba Prizaun Gleno, iha edifísiu PSIC, segunda (18/10). Imajen Tatoli/Francisco Sony

Ajente Xefe Polísia ne’e komete kazu burla agravadu no falsifikasaun dokumentu iha 2019, hafoin Tribunál Distritál Dili notifika hodi tuir primeiru interogátoriu.

Enkuantu, iha loron 13 outubru 2021, TDD deside sentensa tinan haat kadeia tanba prova komete kazu burla no falsifikasaun dokumentu.

TDD hasai mandadu detensaun kondusaun prizaun ba PCIC tanba ajente polísia ne’e la koopera ho parte justisa liuliu desizaun Tribunál.

“Ita halo mandadu buska no apreensaun ne’e la’ós detein ba oras 72, maibé atu hala’o kondusaun ba prizaun katak ami lori ba prizaun de’it,” nia esplika.

Nune’e, PCIC transporta ona Ajente Polísia FSC hosi Dili ba prizaun Gleno, Ermera hodi kumpre pena tinan haat, iha tuku 12:00, segunda ne’e.

Kódigu penál iha artigu 267 ne’ebé ko’alia konaba burla agravada; 1. Ema ne’ebé, tanba nia hahalok diskretu iha artigu anteriór: a) Hamosu prejuizu ho valór aas-liu dolar amerikanu 2.000; b) Pratika burla hanesan nia servisu loroloron; c) Halo vítima tama iha situasaun ekonómika difisil, sei hetan pena prizaun tinan 3 too tinan 10. 2. Artigu 264 nia dispozisaun aplika mós iha ne’e.

Jornalista : Natalino Costa

Editór       : Florencio Miranda Ximenes

PUBLISIDADEiklan