Eis-FALENTIL no Organizasaun Sagrada Família (OFS) hala'o konferénsia imprensa hodi hato'o prekupasaun assasinatu brutál hasoru Veteranu Lemorai. Iha Sekertáriadu OFS, Fatuhada, segunda (18/10). Imajen Tatoli/Francisco Sony

DILI, 18 outubru 2021 (TATOLI)— Organizasaun Sagrada Família (OSF) no Eis FALINTIL-sira kondena makas hahalok violentu ne’ebe hamate saudozu Celestino Boavida “Lemorai” iha Uasufa, suku Namanei, postu administrativu Quelicai, munisipiu Baucau.

“Ami kondena makas aktu omisídiu brutál ba veteranu Celestino Boavida Ximenes “Lemorai” ne’ebé akontese iha loron 14 outubru. Ami la simu ema oho ita nia maluk eis FALINTIL ka veteranu hanesan animál tanba veteranu nuudar patrimóniu sagrada Estadu RDTL ninian,” Portavóz OSF, Bernardino de Cristo Ferreira “Teki Timor” liuhosi konférensia imprensa iha sede OSF, Fatuhada-Dili, segunda ne’e.

Notísia relevante:  PNTL detein suspeitu oho veteranu Lemorai iha Quelicai

OSF husu ba órgaun judisiáriu sira atu halo investigasaun profundu no hala’o julgamentu própriu hodi aplika pena todan hasoru autór kriminozu sira ne’ebé habadak ona veteranu sira nia vida.

“Ami husu ba lideransa nasionál sira hanesan, Xanana Gusmão, Taur Matan Ruak, Francisco Guterres Lú-Olo, José Ramos Horta, Lere Anan Timur no Mari Alkatiri hodi fó atensaun sériu ba kestaun violentu hasaoru veteranu sira. Sé entidade Estadu sira la fó konsiderasaun imediata no rigorozu hasoru aktu krime, maka ami veteranu no eis FALINTIL sei hala’o  asaun hasoru kriminozu sira ne’e,” Portavóz ne’e rekomenda.

Teki Timor husu mós ba joven-sira atu valoriza no respeita veteranu tanba liuhosi sira nia susar, terus no mate maka Estadu Timor-Leste ejiste.

“Ami mós husu  ba Parlamentu Nasionál atu projeta lei espesífiku ida hodi valoriza no halo  protesaun própriu ba asuwain FALINTIL sira iha sosidade nia le’et,” Teki Timor sujere.

Alende ne’e, OSF mós husu ba veteranu no maluk rezisténsia sira iha territóriu laran atu hametin nia liña komunikasaun no promove unidade hodi labele sai tan vitíma ba aktu violentu sira.

Notísia relevante: Kazu oho Lemorai, TDB aplika prizaun preventiva ba arguidu na’in-rua

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here