Komunidade aldeia Busadao asesu de’it solar panel tanba seidauuk asesu eletrisidade. Imajen Tatoli/Celestina Teles.

COVALIMA, 18 outubru 2021 (Tatoli)—Komunidade iha Suku Belekasak, aldeia Busadao, Du’ut no aldeia Ila, iha postu administrativu Maucatar seidauk asesu eletrisidade maibé sira uza de’it solár panél. 

“Komunidade iha ne’e la asesu eletrisidade hahú hosi tempu portugés to’o ohin loron, maibé sira uza de’it solár panél to’o ohin loron,” Xefe Suku Belekasak, Leonito Gusmão, informa ba Agência Tatoli, iha kampaña vasinasaun ne’ebé Vise-Ministru Edukasaun Juventude no Desportu António Guterres hala’o iha aldeia Busadao, suku Belekasak, segunda ne’e. 

Tuir nia, solár panél ne’ebé komunidade utiliza ne’e tanba uza tempu kleur ona entaun balun avaria ona, nune’e komunidade balun uza de’it lampu tradisionál.

Nu’udar autoridade lokal, nia dehan, iha responsabilidade hodi hato’o proposta ba iha parte relevante sira maibe to’o ohin loron seidauk iha resposta. 

“Ita hatene bainhira komunidade uza de’it solár panél iha tempu udan defisil tebes, nune’e sira uza de’it lampu tradisional, tanba solár panél ne’e nia utiliza enerjia hosi loromatan,” nia hateten. 

Abitante Maria de Jesus haktuir, komunidade aldeia Busadoa la asesu eletrisidade durante tempu portugés to’o ohin loron, sira moris de’it iha nakukun laran.

“Maske ita ukun an tinan 20 ona, ami kontinua moris iha nakukun laran. AMI la sente ukun an ida-ne’e, tanba ami la asesu eletrisidade maibé uza de’it solár panél,” nia dehan.

Maria de Jesus husu Governu atu dada liña eletrisidade ba sira-nia uma, nune’e sira belé akompaña informasaun liuhosi Televizauun. 

Suku Belekasak kompostu hosi aldeia hituu (7) mak aldeia Dais, Lolowa no Loloba mak asesu ona eletrisidade, no hela de’it aldeia Du’ut ho nia populasaun 400 no xefe  família  90,  aldeia Busadoa populasaun hamutuk 402 no xefe família 80 no Aldeia Ila populasaun 345 ho xefe família 72 mak seidauk asesu eletrisidade. 

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here