Prezidente KFP, Faustino Cardoso. Imajen Tatoli/Francisco Sony

DILI, 18 outubru 2021 (TATOLI)— Komisaun Funsaun Públika (CFP,sigla Portugés), husu ba Parlamentu Nasionál halo altera lei 12/2016, 4 novembru, kona-bá Kriasaun Rejime Kontributivu Seguransa Sosiál atubele hala’o reforma obrigatóriu ba funsionáriu públiku idade 60.

“Ema ko’alia duni atu reforma funsionáriu públiku tinan 60, maibé tenke define iha lei ruma tanba to’o ohin loron ita seidauk iha lei atubele implementa,” Prezidente Komisaun Funsaun Públika (CFP, sigla Portugés), Faustino Cardoso, hateten, ba Agência TATOLI iha edifísiu MNEK-Dili, segunda ne’e.

Nune’e, KFP submete ona proposta alterasaun ba Parlamentu Nasionál kona-ba lei númeru 12/2016, Kriasaun Rejime Kontributivu Seguransa Sosiál atu hatur artigu ida halo reforma obrigátoriu ba funsionáriu públiku.

Tanba lejizlasaun ne’e hosi artigu 1 to’o 72 seiduk iha artigu espesífiku ida define kompétensia ba Komisaun Funsaun Públika halo reforma obrigatóriu ba funsionáriu públiku sira.

Iha preamblu lei ne’e mós hakerek obrigatóriamente reforma ba funsionáriu sira bainhira atinje idade 60, maibé lei ne’e rasik la hatuur iha artigu ruma, tanba ne’e presiza halo alterasaun. 

Responde ba kestaun ne’e, Prezidente Parlamentu Nasionál (PPN), Deputadu Aniceto Longuinhos Guterres Lopes, informa, iha tempu besik, meja Parlaementu Nasionál halo ajendamentu ba diskusaun alterasaun lei ne’e, hodi hatama artigu ida atu limite idade serbisu iha funsaun públiku.

“Parlamentu rasik iha ona inisiativa hodi halo alterasaun ba lei 12/2016 kona-ba reforma nian atu bele define idade serbisu efetivu ba funsionáriu,” Deputadu Aniceto kompromete.

Iha tinan 2018, KFP rejista funsionáriu ne’ebé tama ona lista reforma purvolta 1.000 no ema ne’ebé tinan 60 ba leten hamutuk 1.700.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here