Prezidente KFP, Faustino Cardoso. Imajen TATOLI/Francisco Sony

DILI, 18 outubru 2021 (TATOLI)—Komisaun Funsaun Públika (KFP) hasai ona sirkulár ba instituisaun Estadu sira atu submete lista funsionáriu no ajente administrasaun públika sira ne’ebé simu ona vasina kontra COVID-19.

“Iha fulan-tolu liubá, komisaun hasai ona sirkulár ba nível Diretór Jerál iha liña ministériu atu aprezenta dadus kona-ba situasaun vasinasaun nível liña ministériu no instituisaun públika sira ida-idak,” Prezidente KFP, Faustino Cardoso, informa, hafoin hasoru Primeiru-Ministru, Taur Matan Ruak, iha Rezidénsia Ofisiál, Farol, segunda ne’e.

Maski nune’e, tuir Prezidente KFP, to’o ohin loron foin instuisaun balun de’it mak hato’o ona lista hanesan Prezidénsia Repúblika, Parlamentu Nasionál no ministériu balun, enkuantu seluk seidauk.

“Ami seidauk simu kompletu, bainhira kompletu ona mak ami sei atualiza ba Primeiru-Ministru atubele fó idea kona-ba taxa vasinasaun iha nível funsaun públika, nune’e hakat ba normalidade,” nia akresenta.

Tuir Prezidente KFP, kona-ba ajente administrasaun públika ne’ebé la vasina, labele marka prezensa iha serbisu fatin, depende ba ida-idak ninia superiór.

“Desizaun Konsellu Ministru kona-ba regra ba funsionáriu sira la vasina, ne’e depende ba instutuisaun ida-idak atu implementa tuir, oinsá funsionáriu públiku sira ne’e hetan ona vasinasaun, ezemplu iha KFP kuaze 90% simu ona vasina. Sira ne’ebé seidauk tanba grávida no moras hela, maibé komisaun sempre enkoraja sira tenke vasina hotu,” nia esklarese.

Antes ne’e, liuhosi reuniaun Konsellu Ministru, membru Governu sira fó hanoin ba malu hodi implementa medida ezekusaun Estadu Emerjénsia da-XVIII, katak funsionáriu sira ne’ebé la vasina, labele marka prezensa iha serbisu fatin.

Notísia relevante: Ajente administrasaun públiku la vasina labele marka prezensa iha serbisu fatin

Tuir regra ezekusaun medida Estadu Emerjénsia, husu ministru sira atu impoin rekezitu ka regra sira iha ministériu no instituisaun sira hotu, liuliu ba funsionáriu sira, ne’ebé funsionáriu atu mai serbisu tenke vasina, maibé bainhira la vasina tenke hatudu prova rezultadu teste swab COVID-19 kada semana, nune’e komprova katak livre hosi vírus ne’e.

Desizaun ne’e nu’udar opsaun alternativa ida hodi proteje-an no proteje ema seluk iha serbisu fatin.

To’o tinan 2019, funsionáriu públiku inklui ajente administrasaun públika hamutuk 33.031 no hosi númeru ne’e na’in-28.000 resin nu’udar funsionáriu permanente, enkuantu sira seluk hanesan funsionáriu kontratadu, nu’udar ajente administrasaun públika no la konta ho funsionáriu kazuál ne’ebé daudaun ne’e pur-volta 6.000.

Tuir dadus atualizadu, vasina ne’ebé fó ona ba populasaun elijível (idade 18 ba leten), iha nível territóriu nasionál, vasina doze dahuluk atinje 67,6% no daruak 43,2%.

Enkuantu, iha munisípiu Covalima doze dahuluk 82,9% no doze daruak 53,1%, Viqueque doze dahuluk 81,1% doze daruak 51,5, Dili doze dahuluk 81,1% no doze daruak 71%, Rejoaun Administrativa Espesiál Oé-cusse Ambeno (RAEOA) doze dahuluk 76,7% no daruak 44,2%, Baucau doze dahuluk 71,2% no doze daruak 37,9%, Manufahi doze dahuluk 67,2% no doze daruak 29,5%, Manatuto doze dahuluk 64,3% no doze daruak 30,9%.

Munisípiu Aileu doze dahuluk 58,4% no doze daruak 23,4%, Lautém doze dahuluk 56,6% no doze daruak 29,7%, Liquiçá doze dahuluk 54,2% no doze daruak 27,4%, Bobonaro doze dahuluk 50,6% no doze daruak 27,9%, Ermera doze dahuluk 48,0% no doze daruak 15,6%, no ikus liu mak Ainaro doze dahuluk atinje 47,6% no doze daruak 18,8%.

Kona-ba kazu pozitivu ne’ebé relata iha segunda ne’e, pozitivu hamutuk 11, kompostu hosi na’in-rua iha Dili no munisípiu seluk na’in-sia, rekuperadu 12 no ativu 98.

Jornalista  : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here