Prezidente Parlamentu Nasionál (PPN), Aniceto Longuinhos Guterres Lopes, Ministra Negósiu Estranjeiru no Kooperasaun (MNEK), Adalgiza Albertina Xavier Magno no Prezidente KFP, Faustino Cardoso, halo abertura teste promosaun grau jerál tinan 2021 ba funsionáriu públiku sira. Iha salaun MNEK, segunda (18/10). Imajen Media MAPKOMS

DILI, 18 outubru 2021 (TATOLI)– Komisaun Funasuan Públika (CFP,sigla Portugés), hahú halo promosau ba graun funsionáriu públiku liuhosi teste eletróniku ne’ebé ofisialmente hala’o abretura iha edifiísiu Ministériu Negósiu Estranjeiru no Kooperasaun, Dili, segunda (18/10).

Prezidente Parlamentu Nasionál (PPN), Deputadu Aniceto Longuinhos Guterres Lopes, hateten, CFP órgaun importante ida ba Estadu no interese nasionál, nune’e tenke tau importansia ba sira hodi hala’o serbisu ho di’ak liuhosi abilidade ho profisionál.

“Ohin ita loke abertura ba serimonia ne’e ho teste ba funsionariu sira ho meiu eletróniku fiar katak funsionáriu sira bele kompete ho di’ak,” Prezidente Parlamentu Nasionál ne’e hateten liuhosi diskursu abertura ba promosaun grau funsionáriu.

Parlamentu Nasionál dala-barak simu keixa hosi Funsionáriu Públiku kona-ba nia karreira tanba liu tinan 10 ona serbisu la hetan direitu ba promosaun.

Prezidente CFP, Faustino Cardoso, hateten, promosaun ne’e ho baze ba Dekretu-Lei númeru 1/2018, rejime promosaun no hetan alterasaun ba Dekretu-Lei númeru 5/2019, 27 marsu.

“Vaga ba promosaun grau ne’e hamutuk 878, ne’ebé funsionáriu públiku 8.706 mak kompete, nune’e teste ida ne’e kompetetivu tebes. Tanba ita nia funsionáriu ne’ebé liu vaga ne’e sei hasa’e nia saláriu iha janeiru 2022,”

Funsionáriu públiku ne’ebé tuir teste promosaun graun hamutuk 8.706, kompostiu hosi mane 6492 no feto 2214, ne’ebé inklui funsionáriu Diplomata iha diáspora na’in 36 hosi nasaun 19.

Prezidente CFP esplika, objetivu hosi teste ne’e atu fó oportunidade ba funsionáriu públiku sira nee’bé prénxe rekizitu bele tuir teste hodi hasa’e sira-nia graun no hodi hatan ba prestasaun serbisu administrasaun públiku ho kualidade, profisionál, efikás no efesiénsia.

Tuir ajenda, prosesu teste ba FP halo durante loron 30, hahú 18 outubru to’o 03 dezembru 2021, ho mezanizmu teste halo hosi via online ba funsionáriu iha diáspora. Enkuantu ba funsionáriu rai-laran sei tuir direita iha sekretariadu KFP Dili.

Aleinde ne’e, mekanizmu teste ba promosaun sei halo iha turnu tolu no kada turnu sei simu kandidatu na’in 100 no kada funsionáriu tenke lori kartaun kinur vasinasaun no rezultadu teste swab hodi kumpre regra protókulu saúde mundiál

Partisipa iha seremónia abertura maka Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, Ministru Justisa (MJ) Manuel Cárseres, Sekretária Estadu Kooperativa (SEKoop), no Diretór Jerál no Nasionál liña ministerial sira.

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here