Diretór Ezekutivu FONGTIL, Daniel Santos do Carmo. Imajen TATOLI/Francisco Sony

DILI, 18 outubru 2021 (TATOLI)—Forum Organizasaun Naun Governamentál Timor-Leste (FONGTIL) durante ne’e observa implementasaun kampaña vasina iha territóriu tomak, ne’ebé nota katak komunidade balun seidauk entende didi’ak importánsia vasina iha ámbitu pandemia.

“Hosi monitorizasaun ne’ebé membru sira akompaña iha terrenu, iha sentru vasina 40 iha munisípiu 11 inklui Rejiaun Administrativa Espesiál Oé-cusse Ambeno (RAEOA) hosi loron 11 to’o 13 outubru 2021, nota katak iha komunidade balun mak seidauk entende didi’ak, maibé maioria kompreende ona vantajen vasina, liuhosi sosializasaun kampãna vasina ne’ebé agora daudaun membru Governu rasik to’o ba komunidade,” Diretór Ezekutivu FONGTIL, Daniel Santos do Carmo, hateten liuhosi konferénsia imprensa ne’ebé hala’o iha salaun FONGTIL, Caicoli, segunda ne’e.

Notísia relevante: PM orienta membru Governu hala’o kampaña vasinasaun iha territóriu nasionál

Tanba ne’e, FONGTIL rekomenda Governu koordena ho Igreja no entidade seluk hodi intensifika fahe informasaun ba komunidade, liu-liu iha área rurál ne’ebé menus informasaun, nune’e komunidade bele iha konsiénsia hola parte iha vasina no automátikamente bele hasae taxa partisipasaun.

“Ministériu Saúde presiza aprosimasaun Igreja, Konsellu Veteranu Antigu Kombatente, Akadémiku no sosiedade sivil hodi ajuda mós fahe informasaun ba komunidade hodi konvense sira hakat ba simu vasina, tanba komunidade balun tauk tanba rona informasaun falsa ne’ebé espalla iha rede sosiál,” nia akresenta.

Aleinde ne’e, FONGTIL husu Ministériu Saúde tau atensaun ba jestaun fasilidade no lojístika sira iha munisípiu.

“Importante tebes fasilidae hanesan bee-moos, sabaun fase liman, no aumenta jeleira hodi rai vasina iha sentru saúde sira, atu asegura kualidade vasina,” nia akresenta.

FONGTIL mós fó hanoin ba Ministeriu Saúde atu hamutuk ho Ministériu Obra Públika (MOP) no Eletricidade de Timor-Leste, Empreza Públika (EDTL, E.P) atu asegura nafatin eletrisidade sira iha Timór laran tomak hodi bele funsiona di’ak, atu nune’e bele asegura vasina sira ne’ebé iha ho seguru no di’ak ba komunidade.

“Bainhihra ahi mate bele prejudika ba partisipasaun komunidade simu vasina, tanba iha sentru vasinasaun balun, komunidade barak atu simu vasina maibé derepente ahi mate, entaun labele fó vasina. Daudaun ne’e munisípiu hotu iha progresu ba vasina ne’ebé iha mundansa, presiza ita hotu nia kontribuisaun hodi bele atinje alvu 80% molok tinan ne’e ramata,” nia dehan.

Tuir dadus atualizadu hosi sistema saúde, partisipasaun populasaun iha territóriu tomak ba vasina doze dahuluk hamutuk 510.123 (67,6%) no doze daruak 326.356 (43,2%), ne’ebé totál kobertura hamutuk 836.479.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here