Eskola Ensinu Sekundáriu Tékniku Vokasionál, Becora. Imajen TATOLI/Nelia Fernandes

DILI, 18 outubru 2021 (TATOLI)–Estudante 3o ano hamutuk 407 hosi eskola Ensinu Sekundáriu Tékniku Vokasionál (ESTV) Becora halo hela esforsu hodi prienxe rekizitu tolu hosi eskola molok partisipa ezame nasionál ne’ebé sei realiza iha dezembru tinan ne’e.

Diretór Eskola ESTV Becora, Francisco Guterres, hateten, rekizitu ne’ebé tenke prienxe maka ezame modulares, estájiu, no ezame prova aptidaun profisionál, hafoin liu faze ne’e foin bele tuir ezame nasionál.

“Rekizitu tolu mak sei termina estudante 407 hodi bele hakat ba ezame nasionál, se rekizitu ida de’it mak la prienxe ho valór  di’ak, sei lakon direitu tuir ezame nasionál,” Diretór Eskola informa ba Agência TATOLI, iha ninia knaar fatin, Eskola ESTV Becora, segunda ne’e.

Notísia relevante: MEJD enkoraja estudante sira hakaas-an iha ezame nasionál

Totál estudante Ensinu Sekundáriu Tékniku Vokasionál Becora hamutuk 1.397.

Nia esplika, bainhira estudante ida durante ne’e iha kréditu barak liha modulares, entaun estudante ne’e labele kontinua ba atividade formasaun iha kontestu traballu ka estájiu.

“Tenke finaliza modulares ne’ebé kréditu mak estudante foin bele partisipa iha estájiu,” nia akresenta.

Durante fulan-rua estájiu ne’e ramata, estudante sira tenke elabora relatóriu sira no kompañia, empreza públika ka instituisaun sira ne’ebé estudante sira estájiu ba mak fó valór, hafoin tau hamutuk ho relatóriu ne’ebé sira halo.

”Se estudante ida maka valór la di’ak iha faze elaborasaun relatóriu, entaun nia labele simu orientasaun atu tama ba prova aptidaun profisionál, enkuantu iha faze ne’e mak estudante ida hetan valór 5 signifika aprovadu, maibé kuandu hetan de’it valór 4, entaun tenke dezenvolve fali ninia-an no hadi’a fali matéria sira. Maibé kuandu nia la hadi’a nia-an konsidera la pasa,” Francisco esplika.

Nune’e mós, ba estudante 407, maski prienxe hotu rekizitu iha ezame modulares, estájiu no provas aptidaun profisionál ho valór di’ak, maibé iha posibilidade ezame nasionál balun la pasa tanba valór la di’ak.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here