Komandante Ein-Xefe FALINTIL, Kay Rala Xanana Gusmão akompaña hosi Reprezentante Forsa Austrália, Carl Capper, halo abertura segundu jogu amizade FALINTIL no INTERFET iha estádiu Munisipál Dili, 02 outubru 2020. Imajen Tatoli/Eugénio Pereira

DILI, 18 outubru 2021 (TATOLI)–  Ekipa FALINTIL-Forsa Defeza Timor –Leste (F-FDTL) manán INTERFET 4-0,iha  jogu amizade ba tasa Xanana Shield, hodi selebra tinan 22 Forsa INTERFET tama Timor-Leste, ne’ebé hala’o iha Estádiu Munisipál Dili, segunda ne’e.

Jogu ne’e serbisu hamutuk entre F-FDTL no Forsa Australianu, Nova Zelandia no Portugál iha Timor – Leste.

Iha minutu primeiru hahú, ekipa rua lansa kontra-atake ba malu hodi buka atu hatama golu atu hiit tasa Xanana Shield.

Esforsu ekipa rua la hela de’it hanesan esforsu tanba iha minutu 34 jogadór F-FDTL ho númeru kamizola 7 lansa ona golu ida hodi muda rezultadu ba 1-0. Golu ne’e hanesan golu úniku iha primeira parte.

Bainhira deskansa minutu 15,  Eis Komandante FALINTIL, Kay Rala Xanana Gusmão marka prezensa iha Estádiu Munisipál Dili, hafoin to’o hatais kedan kamizola númeru 1 hanesan guarda rede hodi subtitui guarda rede anteriór.

Tama segundu parte Xanana Gusmão tama mos kampu sai guarda rede ne’ebé metin tebes, halo jogadór INTERFET labele marka golu.

Dolar ba minutu 57 sorte di’ak monu ba ekipa FALINTIL tanba defeza INTERFET nian halo falta hasoru jogadór F-FDTL iha liña oin, nune’e árbitru deside fó penalidade ne’ebé ezekuta direita hosi jogadór númeru kamizola 4 konsege doko rede INTERFET nian hodi muda eskore ba 2-0.

Ho golu daruak ne’e, halo jogadór INTERFET tenke esforsu makas, la konsege hatama golu ida hodi muda eskore.  

Hosi oportunidade ne’e fó biban nafatin ba ekipa FALINTIL prodús golu tan minutu 68 hosi jogadór númeru kamizola 2 hatur rezultadu ba 3-0.

Jogu sai manas liután ba ekipa rua, maibé ekipa F-FDTL nafatin domina bola hodi fó ameasa ba ekipa INTERFET ikus mai hamosu tan golu ida iha minutu 80 hosi jogadór ho númeru kamizola 7 hatuur metin rezultadu 4-0 no  to’o minutu termina laiha tan golu ruma.

Hafoin remata jogu,  Eis Komandante FALINTIL, Kay Rala Xanana Gusmão, hateten hala’o tan atividade jogu atu relembra fali INTERFET mai Timor-Leste hodi salva populasaun  sira.

“Ita lembra fali ita nia istória, halo mós ita lembra solidariedade internasionál liuhosi INTERFET,  importante tebes bainhira ita manan tia referendum sira mós apoiu ita maka’as,” Xanana Gusmão afirma.

Komemorasaun ne’e, Tuir Xanana atu fó hanoin hikas ba jerasaun foun sira labele haluha prosesu sira iha tempu pasadu hodi kontinua kontribui ba prosesu dezenvolvimentu iha Timor-Leste.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here