Diretór Diresaun Transporte Terrrestre (DTT), munisípiu Bobonaro, Jose Paulo Henrique Baptista. Imajen Agência TATOLI/Sérgio da Cruz.

BOBONARO, 18 outubru 2021 (TATOLI)— Diresaun Transporte Terrestre (DTT) munisípiu Bobonaro, hatama reseita ba kofre estadu hamutuk $6.360 ba kofre estadu iha fulan-setembru nia laran.

Diretór Transporte Terrestre, munisípiu Bobonaro, Jose Paulo Henrique Baptista, informa reseita hirak-ne’e rekolla mai hosi fonte inspesaun veíkulu, lisensiamentu, trata no renova karta kondusaun.

“Osan ne’e ita halibur kompostu hosi inspesaun veíkulu totál $3.685, lisensa $305, karta kondusaun $1.875 no rejistu veíkulu $585, totál ba fulan ida-ne’e $6.360,” Diretór ne’e informa ba jornalista sira, iha nia kna’ar-fatin segunda ne’e.

Nia haktuir, iha situasaun pandemia Covid-19 DTT Bobonaro kontribui reseita ba kofre estadu iha fulan-janeiru $ 13.930, fevereiru $6.814,50, marsu $6.709,50, maiu $2.195, juñu $5.677,50 no fulan-jullu $7.345.

“Osan ne’e la inklui fulan-abríl nian, tanba momentu ne’e ita (Bobonaro) aplika serka sanitária no konfinamentu obrigatóriu, entaun regra ne’e obriga ita hela de’it iha uma no bazea ba orientasaun ami la halo atendimentu ba públiku,” nia esplika.

Nia dehan, tinan ne’e DTT Bobonaro hatama reseita menus kompara ho tinan antes, tanba impaktu hosi implementasaun estadu emerjénsia no serka sanitária, ne’ebé mak limita sidadaun hotu nia movimentu ba atividade ekonomia no seluk tán.

Maske DNTT Bobonaro kontribui reseita maka’as ba kofre estadu kada tinan, maibé kontinua enfrenta difikuldade oinoin kona-ba fasilidade mobiliáriu hanesan meza, kadeira no transporte operasionál.

“Fatin ida-ne’e naran mak Diresaun Transporte Terrestre maibé karreta ho motorizada ida de’it mós laiha, atu fasilita ami halo atividade iha terrenu, ida-ne’e mak ami preokupa tebes,” nia katak.

Enkuantu problema ne’e, aprezenta beibeik ba ministériu kompetente liuhosi relatóriu anuál, maibé seidauk tau iha konsiderasaun atu rezolve.

Enkuantu totál funsionariu iha DTT munisípiu Bobonaro hamutuk 11 kompostu hosi permanente na’in-neen no kontratadu na’in-lima.

Jornalista: Sérgio da Cruz

Editór: Evaristo Saores Martins

PUBLISIDADEiklan

HAKEREK NO HATÁN

Please enter your comment!
Please enter your name here