ONG BIFANO apoia bidón-plástiku (plastic drums) no apoia fini natar ba komunidade vulneravél 200 iha RAEOA. Imajen/mídia BIFANO.

OÉ-CUSSE, 18 outubru 2021 (TATOLI) — Organizasaun Naun Governamentál (ONG) Binibu Faef Nome (BIFANO), apoia bidón-plástiku (plastic drums) ba komunidade na’in-200 iha suku-lima iha Rejiaun Administrativa Espesiál Oé-Cusse Ambeno (RAEOA) nune’e konserva fini batar no ai-hán seluk ba tempu naruk.

Atividade ne’e apoia fundu hosi ONG internasionál OXFAM no programa Australian Humanitária Project (AHP), atu tulun komunidade vulnerável sira hodi fasilita plastic drums atu rai fini ai-hán nomoos fornese fini batar noi-mutin atu kuda iha tinan ne’e.

“Ita apoia ona plastic drums ba komunidade ho kondisaun vulnerável atu rai fini ai-hán saida de’it, hanesan rai fini batar nian, nomoos apoia tán ho fini batar noi-mutin ba sira, tanba daudaun ne’e komunidade sira prepara ona atu kuda batar iha tinan ne’e, ne’e maka ekipa sira identifika ona uma kain-200 maka hetan apoiu ne’e,” Diretór ONG BIFANO, Jacinto Mala, informa ba Agência TATOLI, iha edifisiu BIFANO, Masin Oé-Cusse, segunda ne’e.

Komunidade vulnerável na’in-200 mai hosi suku-lima, kompostu hosi sub rejiaun Oésilo iha suku Usitasa’e, aldeia Buqui, hamutuk na’in-50, sub-rejiaun Nítibe, suku Ban-Afi, iha aldeia Neof-Metan, na’in-50.

Nune’e mós sub-rejiaun Pante Makassar, suku Lifau, iha aldeia Tula-Ika na’in-30, suku Bobokase, aldeia Bihala, na’in-40, suku Nipani, aldeia Sakato na’in-30.

Iha parte seluk, ONG BIFINO mós apoia petty-cash ka cash-box ba grupu rai-osan ba mudansa (romansa) hamutuk grupu 21. Tuir planu sei apoia tán fasilidade seluk ligadu ho pandemia COVID-19.

Xefe suku Usitasa’e, Tomas Ulan Colo, agradese ba ONG BIFANO ne’ebé fasilita téknika ba agrikultór kona-ba konstrui Gabiaun tradisionál no apoia umanitária ba komunidade vulnerável sira.

“Ha’u agradese tanba iha suku Usitasa’e hetan ona programa barak hosi ONG BIFANO, hanesan hadi’a estrada ne’ebé sai risku ba dezastre naturál iha tempu udan, no ohin hetan-tán apoiu umanitária ne’e”, lidér lokál ne’e agradese.

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here