POEZIA
Hosi Poetiza TL: Alexandra Tilman
Iha loron manas ninia si´ak
Iha udan no anin-nia sasadik
Ha´u matan kamat hetan ó isin lolon iha dalan ninin,
Iha patraun alkatraun mak haliis kadeira iha ó oin
Iha aileba no roda tolu ba to´o odamatan lubuk leten aas
Iha ukun-na’in balun mak laran nakukun haluha-an
Haliis Lei-Inan, lei-oan
hodi haluha tiha katak Ita hotu hela iha Lei-nia Okos.
Iha lidun-lidun be hakmatek, iha dimensaun rihun no tokon
La hamate ó espíritu be hamlaha no hamro´ok,
Ba notísia wa’in rai laran to´o tasi baluk.
La hamate ó ain-fatin iha fatin-fatin ba fatin
Hodi nalo ó kna´ar.
Kna´ar Jornalizmu be sagradu.
Iha dalan terik be naruk, aitarak kro´at wa’in satan ó ain fatin
Ó Tuba metin hamnasa midar la hakiduk ó le´ut nafatin.
Ó Le´ut tuir aileba wa’in be hamlaha ba Lia-loos no Justisa
Ó Le´ut tuir ema wa’in mak mehi ba dukur-nia hakmatek
Ó Leut tuir Kazaku, Gravatadu balun mak hamrook ba signifikasaun Podér
Podér nodi sama no hanehan ki´ik, ki´ak, mukit
be halerik la lahas to´o dalan ninia wa’in mós sai Sanfradu no Frustradu.
Iha surat-tahan pedasuk kulafur ninia leten
Lapizeira kwarter [25 sentavu] nia folin iha ó liman
Ranesan manu kee no su´u –rai nia bokur leut tuir mehi
Mak ami hasubar hela iha kakutak-nia nakukun,
Mak ami hasubar hela iha Ambisaun no Egoízmu-nia Lalatak
Mak ami hasubar hela iha Kolusaun, Korupsaun, Koluzaun no Nepotizmu-nia Mehi
Ó ha´u-belun…
Le´ut metin ó ain fatin ba…
“Hahú Ó Loron Ohin ho Informasain no Inspirasaun”
Nalo Semo Ami bá iha surat-tahan kulafur-nia leten, Belun!!!
Viva Jornalista Timor-Leste
Memória Metiaut, sábadu 16 outubru 2021
Alexandra de Araujo Tillman (Sandra Tilman) moris iha Ainaro-Maubisse, 28 maiu 1976. Nia hahú hanorin iha SMPK São Jose Balide (1996-1999). Tinan 2000-2008 iha Colegio Sao José Balide. Iha 2000-2008 nu’udar Prezenter Televizaun ba CPA ba programa “Istória Ba Futuru”. Eis dosente parte tempu iha UNDIL no IOB iha tinan 2006-2008.
Daudaun ne’e nu’udar dosente permanete iha UNTL, Fakuldade Edukasaun Arte no Umanidade, Departamentu Tetun, membru ekipa Institutu Nasionál de Linguistíka (INL). Instrutora Dalen-Tetun hosi UNTL ba Formasaun Akademia PNTL iha tinan 2015-2017.