Diretór Ezekutivu no Prezidente Arquivu Muzeu Rezisténsia Timorense (AMRT), Hamar Antóninho Baptista Alves, foto hamutuk ho Veteranu inklui lia-nain sira iha Suku Ossoala, hala’o seremonia komprimisu Centru Bisau Kablaki A, Sábadu (16/10). Imajen TATOLI/Natalino Belo

BAUCAU, 17 outubru 2021 (TATOLI)— Konsellu Kombatente Libertasaun Nasionál (CCLN, sigla Portugés) planeia transforma fatin rezisténsia Sentru Bisau Kablaki A, iha suku Ossoaloa sai fatin  turismu istóriku.

“Ami planu no hakarak transforma fatin gerilia sira sai fatin turizmu istóriku, maibe ami sei haree fazeadamente tanba presiza orsamentu. Bainhira Governu apoia orsamentu ita sei halo,” Vise Prezidente CCLN, Mario Nicolao Marito dos Reis, hateten, bainhira partisipa seremonia komprimisu rituál Sentru Bisau Kablaki A no intrega dokumentu rezistensia hosi kaixa klandestina ba Arquivu Muzeum Rezistensia Timorense iha sede suku Ossoala, Sábadu ne’e.

Vise Prezidente CCLN, Mario Nicolao Marito dos Reis, entrega bua no malus ba lian-nain Ossoala iha seremonia ritual,Sábadu (16/10). Imajen TATOLI/Natalino Belo

Objetivu hosi transforma fatin rezisténsia ba turizmu istoriku tanba hakarak prezerva istoria liuliu baze gerilia, fatin subar Komandu luta-sira, hodi sai fatin aprendizajen ba foin sa’e Timor-Leste.

Iha tinan 1975, Centru Bisau Kablaki A nu’udar fatin rezisténsia ho rai-lulik, bua no malus maka akompaña Forsa FALINTIL no komunidade Ossoala hodi luta hasoru okupasaun forsa Indonézia.

Nune’e, CCLN rekomenda fó valorizasaun ba natureza ka fatin gerilia sira tanba ho nia natureza ajuda luta na’in-sira halo funu to’o ukun rasik an.

“Ita sei mai hamutuk fali iha fatin ida-ne’e atu kombina hadi’a fatin ne’e, atu konsidera no fó onra no glória ba fatin istóriku ida-ne’e, tanba hosi matak-malirin ne’ebé simu hosi fatin ne’e lori halo operasaun iha Uaimori nia rezultadu hadau kilat no ekipamentu seluk,” Eis gerileiru ne’e akresenta.

Partisipa iha seremonia hanesan Diretór Ezekutivu no Prezidente Arquivu Muzeu Rezisténsia Timorense (AMRT), Hamar Antóninho Baptista Alves, responsável Kaixa iha Ossoala, Postu Vemasse, Veteranu António Malu ‘Derok masin’ inklui komunidade.

Jornalista: Natalino Belo

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here