Lian-na’in hosi uma-lisan Chacailala halo serimónia rituál ba agradesimentu ba kompromisu Saudozu Vicente Reis ‘Sahe’, iha Lita no hodi fali bua no malus iha Ossoala, sábadu (16/10). Imajen TATOLI/Nelson de Sousa

BAUCAU, 16 outubru 2021 (TATOLI)–Ita tenke sai hotu halo funu, forsa sai hanesan ikan no povu sai hanesan bee, fó hatene ba ha’u-nia foho lulik Ossoala, natureza hotu-hotu akompaña forsa FALINTIL, ho povu atu halo funu hasoru forsa Indonézia sira atu manán funu”.

Kompromisu Saudozu Vicente Reis ‘Sahe’, ne’ebé hala’o iha  loron 02 novembru, besik troka tinan entre 1976 – 1977, mosu seremónia rituál hanesan komprimisu ida ba luta.

Atu relembra hikas kompromisu ne’e maka Arkivu no Muzeu Rezisténzia Timorense (AMRT), veteranu no komunidade Ossoala, sábadu ne’e, realiza seremónia agradesimentu ba kompromisu Saudozu Vicente Reis ‘Sahe’ iha suku Ossoala, postu administrativu Vemasse, munisípiu Baucau.

Atividade ne’e partisipa hosi konvidadu sira hanesan Vise-Prezidente Konsellu Kombatente Libertasaun Nasionál (KKLN), Mario Nicolau dos Reis, Diretór Ezekutivu no Prezidente AMRT, Hamamar Antoninho Baptista Alves, Reprezentante veteranu munisípiu Baucau, António da Costa ‘Derok Masin’, Koronél Domingos ‘Miku’ ho autoridade munisípal Baucau, ne’ebé hakat ain to’o  iha Ossoala dadeer iha tuku 10:00, ne’ebé simu direta hosi moradór tanbor  ho tebedai tuir kultura suku ne’e nian.

Jestu atrasaun kultura ne’e nu’udar tradisaun suku ba bainaka molok partisipa serimónia ruma.

Komunidade Ossoala simu konvidadu sira ho tradisaun moradór tanbor no tebedai, iha suku Ossoala, sábadu (16/10). Imajen TATOLI/Nelson de Sousa

Hafoin ne’e, konvidadu sira kontinua ba iha fatin seremónia, akompaña mós ho tebedai hosi labarik kiik  hodi fó liafaun benvindu, no lian-na’in rua, ne’ebé lori tais no parte responsável hosi kaixa klandestina sira iha Ossoala mak tara kedas tais ba kada konvidadu.

Iha biban ne’e, inan-feton na’in-rua hodi bua no malus iha kohé, hodi fó hase konvidadu sira moma nu’udar lian respeitu na’in hodi lolo liman hamutuk mai iha knua suku ne’e, hodi partisipa iha  atividade.

Nune’e, prosesu simu bainaka  termina iha tuku 10:20, hodi kontinua kedas ba matabisu hahán lokál, ne’ebé inan-feton sira prepara iha meza.

Lori minutu 15 nia laran, konvidadu no komunidade komesa book-an hosi fatin iha sede suku Ossoala, hodi ida-idak ba iha fatin lulik ka fatin ne’ebé uluk Saudozu Sahe halo kompromisu ho natureza lulik no foho Ossoala ne’ebé si’ak.

Fatin destinasaun ho distánsia kilómetru tolu, maibé iha dalan  to’o fatin, senti la fasil, maski konvidadu no komunidade ho karreta, tanba  dalan ida karreta atu halai ba leten, iha kuak ba-mai no la kaber hetok a’at iha ai-laran tuan no  hakur mós mota dala-tolu, hodi  to’o duni iha fatin Bisau Devulale.

Molok to’o iha fatin, konvidadu no komunidade tuur netik minutu balun, hodi kontinua kedas ho seremónia rituál agradesimentu nian, ne’ebé lidera hosi  lian-na’in, Sebastião Dencio Belo ‘Kailala’, hosi uma-lisan  Chacailala.

Komunidade Ossoala no lian-na’in halo preparasaun ba seremónia rituál., iha suku Ossoala, sábadu (16/10). Imajen TATOLI/Nelson de Sousa

Iha prosesu rituál ne’e, lian-na’in sira hahú uluk harii meza  santu ho hadak hitu no lima, ne’ebé iha hadak kiik rua iha leten, ne’ebé signifika ba Deus (Maromak) no kraik ba avo matebian, no rai  bua ho malus hitu ho lima, bee lulik Wai Gite, Wai-Watu, uza lilin orijén tradisionál rua, nú laloir fuan rua, osan mutin mean hitu ho lima, hudi tahan hodi nahe ho tokir, foos rai mean, kabas mean hitu ho lima katak hitu ne’e.

Agradese ba matak malirin natureza foho lulik Ossoala

Komunidade Ossoala no lian-na’in halo preparasaun ba seremónia rituál., iha suku Ossoala, sábadu (16/10). Imajen TATOLI/Nelson de Sousa

Hafoin ne’e, lian sira konvida Vise-Prezidente KKLN, Mario Nicolau dos Reis, nu’udar Reprezentante saudozu Vicente Reis ‘Sahe’ no konvida mós Reprezentante Komandu FALINTIL hosi munisípiu Baucau, António da Costa ‘Maluk/Derok Masin,  hodi entrega bua no malus, hodi hatur fali meza iha altar.

“Rituál ida-ne’e hanesan símbolu mai entrega filafali bua ho malus, ne’ebé funu hotu ona hanesan agradese ba matak malirin natureza foho lulik Ossoala, ne’ebé uluk Saudozu Sahe halo kompromisu luta hasoru Indonézia ba,” Lian-na’in hosi uma-lisan Chacailala, Sebastião Dencio Belo ‘Kailala’, hateten, iha fatin rituál, Debulale, Ossoala.

Nune’e nia hato’o agradese ba lulik hotu ne’ebé akompaña iha prosesu funu to’o ukun-an.

Mario Nicolau dos Reis, hateten, loron ohin ita kontinua hamutuk mai iha fatin ne’e hodi hatene tuir fatin ne’e Saudozu Sahe fó hela lisensa ho povu ida-ne’e tun filafali ba Waimori  to’o ba tasi mane, hodi husu fó matak malirin ba povu ida hodi halo funu.

No aban bainrua filafali mai kumpre nia promesa iha fatin ida ne’e, hodi kontinua halo moris fatin ne’e tuir kultura Timor nian.

Reprezentante Komandu FALINTIL hosi munisipiu Baucau, Antonio da Costa ‘Malu-Derok Masin’. Imajen TATOLI/Nelson de Sousa

Tuir Veteranu Derok Masin, seremónia rituál loloos duni fatin ne’e hanaran Bisau Komité Zona ba iha Leste, bainhira muda hosi Komandu ne’ebé Saudozu Sahe hamutuk ho  lian-na’in no povu sira husu matak malirin iha luta no nia-parte partisipa mós direita iha momentu ne’ebá.

Nia dehan, hafoin halo kompromisu, Saudozu Sahe nu’udar Segundu Komandante iha kompañia 114 ho ninia soladu na’in-14 no kilat 14, momentu ne’ebá iha operasaun boot ida iha madrugada, ne’ebé inimigu asalta Komandu no Saudozu Sahe ho Prezidente Maulear.

“To’o ba militár sira tama ona iha Waimori, komesa fila ona iha dalan, nune’e ami tiru malu taka iha dalan hasoru militár batallaun ida haree hanesan forsa liu tiha ona, nune’e  fó orden ba soldadu katak ita-nia rate mak ida-ne’e liafuan ba halai no retira laiha maibé mate mak iha,” nia konta tuir.

Nune’e, haree ema ne’e barak liu, nune’e sente fuan nakdoko no mentál monu, maibé hakat oituan iha foho lolon no sadere oituan bolu de’it matak malirin Ossoala, “keta husik ami mesak, nune’e brani filafali ona militár Indonézia sira mai liu de’it, ami nia leten mai nafatin iha abrigu besik tiha tiru dala-ida, monu tun hotu hodi tiru malu loron tomak to’o kalan no iha dadeer konfirma FALINTIL laiha ida mak mate,”

Vise-Prezidente KKLN, Mario Nicolau dos Reis. Imajen TATOLI/Nelson de Sousa

Enkuantu, hafoin termina liafuan  hosi lian-na’in, Vise Prezidente KKLN no Reprezentante Komandu FALINTIL, kontinua kedas oho karau ida no fahi kiikoan ida, hodi koa’ fahi hodi haree nia aten ne’ebé hatudu iha sinál di’ak hodi realiza prosesu rituál ne’e.

Hosi ne’e, komunidade ne’ebé iha fatin seremónia komesa ko’a no tukir etu, ne’ebé lori tempu kuaze oras ida mak tasak, nune’e hatur hikas hahán lulik tradisionál ba meza altar ne’ebé iha.

Sunu lilin tradisionál ne’ebé halo ho kami, hodi akompaña  lian-na’in nia dadolin dala-ida tan hodi hamulak loke dalan lian, kompleta hikas, forsa no governasaun lori fali mai ona bua no malus ne’ebé uluk Saudozu Sahe  hato’o kompromisu rituál, hodi entrega  hanesan iha tempu luta iha uma Umo Bo’o no Chacailala.

Promesa lori karau ida hafoin ukun-an

Hafoin ne’e, Agatão Guerreiro Freitas, hosi uma lisan Chacailala lee sai  filafali akta komprimisu rituál ‘Sentru Bisau Kablaki A’ Ossoala, ne’ebé ohin relembra fali akontesimentu iha tinan 46 ba kotuk ne’ebé akontese prosesu istória ba luta libertasaun pátria.

Komunidade Ossoala no lian-na’in halo preparasaun ba seremónia rituál., iha suku Ossoala, sábadu (16/10). Imajen TATOLI/Nelson de Sousa

“Iha fatin istóriku ne’e duni, ita-nia aman lutadór ida Saudozu kamarada Vicente Reis ‘Sahe’ hateten katak agora ita oho karau Timór metan ida hodi konvida natureza hotu rai-lulik, uma-lulik, foho-lulik Ossoala, akompaña ita atu ba halo funu to’o ita manán. Aban bainrua funu ne’e hotu sei lori filafali karau ida mai, hodi husu agradese filafali iha fatin ida-ne’e mak fatin sentru Bisau Kablaki A,” Agatão Guerreiro, lee tuir.

Iha  loron 02 novembru, besik troka tinan entre 1976-1977, mosu seremónia rituál hanesan kompromisu ida ba iha luta hasoru inimigu forsa Indonézia sira no seremónia refere atu husu forsa natureza hodi harii hadak hitu no lima,  bua ho malus hitu ho lima, bee lulik Wai Gite, Wai-Watu, lilin orijen tradisionál rua, nuu laloir fuan rua, osan mutin mean hitu ho lima, hudi tahan hodi nahe ho tokir, foos rai-mean, kabas mean hitu ho lima katak hitu, ne’ebé hatudu forsa lalehan nian no lima hatudu forsa rai nian hanesan símbulu ida hodi fó espíritu luta ba FALINTIL ho maubere no buibere sira hotu.

“Ohin loron 16 fulan outubru 2021, ita hotu halibur iha fatin ida ne’e atu sai sasin ba iha prosesu rituál kompromisu ne’ebé hosi Saudozu Kamarada Vicente Reis, alias Sahe, ho ninia espoza Wewe, hodi selebra vitória ukun rasik-an,’’ Agatão Guerreiro Freitas  halo leitura.

Tuir nia, promesa katak bainhira Timor-Leste ukun-an ona, sei lori filafali karau ida mai hodi kumpre promesa, ne’ebé hala’o iha tinan 46 ba kotuk.

Iha tempu ne’ebá Komandante ho ninia membru kompañia hotu ne’ebé lokaliza iha área suku Ossoala, sentru konsentrasaun kuadru sivíl no FALINTIL hamutuk hotu iha fatin ida-ne’e mak sentru Bisau Kablaki A.

Komunidade Ossoala no lian-na’in halo preparasaun ba seremónia rituál., iha suku Ossoala, sábadu (16/10). Imajen TATOLI/Nelson de Sousa

Prosesu seremónia rituál ne’e, kompostu hosi akampamentu sia, hanesan akampamentu postu Mar lokaliza iha Hae-hoso, lidera hosi Marito Reis, Komandu Lobito  lidera hosi  Saudozu Beke Sabe Kamarada Cerilio ‘Maubrani’, postu  Culina  lidera hosi  Komandante kompañia Kamarada Mario Nicolau dos Reis, lokaliza iha área Uaibai-Caitea, postu Oteru, lidera hosi kamarada Domingos ‘Leki-Watu’ ho Marcos Correia ‘Maudake’, área baliza entre Ossoala ho Bercoli.

Sekretáriu  Vemasse Furi  lidera hosi  Kamarada Siku ‘Berek’, lokaliza iha baliza Ossoala ho Uaigae,  postu Belu Laek  lidera hosi Kamarada Jóse Veigas ‘Maulaku’ lokaliza iha Uato Cou Leki Dasi ho nia Vise kamarada Jose da Costa ‘Maulemo’.

Akampamentu Timor Laek lidera hosi Kamarada José Viegas ‘Maulaku’ ho Vise Kamarada Marcos Correia ‘Maudake’, lokaliza iha área Cumulale, baliza ho suku Bercoli, postu  Fatu Ahi 2 lidera hosi Komandante Kamarada Jóse Viegas ‘Maulaku”’ho nia Vise Kamarada Braz dos Santos ‘Foos’ lokaliza iha waimesa, kompañia 114 lidera hosi Komandante Kompañia Kamarada António Malu ‘Derok Masin’ lokaliza iha Caidaucou.

Aleinde kompañia Kalohan lidera hosi Komandante Polítika Kamarada Manuel Alves ‘Mauloi’ ho Segundu Vise Kamarada Pedro ‘Lakoko’, lokaliza iha Nau-Oli.

Hafoin halibur hamutuk hosi postu sira ne’e iha prosesu serimónia rituál kumpromisu ne’e, responsável hosi uma-lisan mak hanesan, uma-lisan Umo Bo’o Kamarada Giridoe sai hanesan harii hadak ba rituál nian, ho kamarada Susu Mau buka bua malus.

Uma lisan Chacailala hanesan na’in ba iha fatin rituál, prepara sasán rituál no hamulak ba prosesu rituál ne’e mak Kamarada Naha-Hare, reforsa hosi hamulak uma lisan Caidora Rua/Watubuto Kamarada Alcino Soares ‘Laco-Teli’.

Iha prosesu rituál, partisipa hosi Masunista ka matan-dook hamutuk na’in-10 hanesan kamarada Loidoe ‘husi Uai Culu’ sai hanesan Koordenadór, Kamarada Manudasi hosi Hoi-Neuai  nu’udár Vise-Koordenadór.

Kamarada Susu Loi hosi Hoi-Neuai, nu’udar membru, Kamarada Recardina hosi Hoi-Neuai, nu’udar membru, Kamarada Marcelino Caidu’u Hoi-Neuai no Kamarada Bosi Hau hosi Uaicnassa, Kamarada Gari Loi husi Uaicnassa, Kamarada Melabu husi Loli Nuno, Kamarada Leki Lela husi Umo-Ana-Ico, Kamarada Hare-Ona hosi Venilale Fatulia Wailolo nu’udar membru.

Prosesu rituál inisia hosi Komisáriu Polítiku Sentru Leste, Komité Sentrál FRETILIN, Saudozu Kamarada Vicente Reis ‘Sahe’ no implementa hosi responsável Sentru Bisau Kablaki A, Asisténsia Kamarada Marcos Lobo ‘MeligaMu’,  ne’ebé oferese mós karau Timór aman ida ho folin-tolu eskudu hosi kamarada Sahe rasik no bibi ida hosi uma-na’in Chacailala Kamarada Cai-Loi.

Serimónia ne’e selebra mós misa sakramentu matrimóniu ba kazál rua, ho sakramentu batizmun rua, iha dadeersan  tuku 08:00 otl no selebrasaun misa ne’e prezide hosi Padre Carlos da Rosa, PR ‘Prozo’.

Hafoin finaliza prosesu tomak, Saudozu kamarada Vicente Reis ‘Sahe’ husik hela liafuan motivasaun ba iha partisipante tomak, maubere, buibere no Forsa Armada FALINTIL sira hotu hodi fó korajen ba espíritu aten-brani no luta nia ne’ebé ikus mai sai realidade ba iha tempu ukun rasik-an ida-ne’e, liafuan sira ne’e mak hanesan tuir mai:

“Ita tenke sai hotu halo funu, forsa sai hanesan ikan no povu sai hanesan bee.”

“Fó hatene ba ha’u-nia foho lulik Ossoala, natureza hotu-hotu akompaña forsa FALINTIL ho povu atu halo funu hasoru forsa Indonézia sira atu manán funu”.

“Buibere, Maubere, labele ta’uk atu hasoru forsa Indonézia sira, funu ita sei manán. Manán ona, sei manán tan.”

“Se Indonézia mak manán funu ne’e, entaun sira hamriik kompletu kedas iha ai-hun sira, fatuk sira ne’e nia manán ona, se iha ai-hun no fatuk ida mak sei mamuk mak Timór ne’e sei ukun-an, labarik ida de’it mak sei moris hela mós Timór sei ukun-an nafatin”.

“Malae mutin mai ukun tinan atus haat somente mai hanehan de’it ita, la halo buat di’ak ida, halo  ita sai atan nafatin ba sira-nia ukun, selu impostu ho obrigatóriu, edukasaun ba povu sira limite de’it, sira taka buat hotu-hotu ba povu”.

 “Kamarada Buibere no Maubere sira, imi labele ta’uk no hanoin tuir imi-nia sasán ho animál sira lakon, basá Timór aban bainrua ukun-an”

“Kuda ho karau agora lakon, sei troka fali motór, karreta ho tratór.”.

“Ita-nia uma du’ut no tali tahan sira sunu hotu sei troka fali ho kalen.”

“Tau hakfolik hodi halo funu, sei troka fali ho kalsa naruk no sapatu hodi halai natar.”

“Ba hein karau no kesi kuda, tara ho kohe talin hodi tau bukae aban bainrua funu hotu imi sei tara fali pasta ba hein karau no kesi kuda”.

“Inimigu hanesan ha’as, ohin sei monu fuan ida-ida, to’o nia tempu tasak hotu, labarik ida sa’e doko namtate tuun hotu, fuan ida de’it mós sei la hela.”

“Kamarada sira labele ta’uk, kilat ne’ebé sira lori mai ne’e ita-nian, hadau hodi kontra fali sira.”

“Kamarada Maubere no Buibere sira, labele la’o mesak, ita hanesan ai-sar, ida de’it fásil ema silu tohar, kuandu hamutuk ita forte no manán funu ne’e.”

“Kamarada Maubere no Buibere sira, labele ta’uk atu mate kompara hanesan ita halo to’os, kuandu lere mós de’it du’ut sira batar sei  la isin, hatuun ai-hun mak sei fó batar isin di’ak, han sei la hotu to’o nia jerasaun ba jerasaun”.

“Hahú halo funu gerilla iha fatin ida-ne’e, aban bainrua funu hotu finaliza fali iha mós fatin ida ne’e, Sentru Bisau Kablaki A.”  Saudozu Vicente Reis ‘Sahe’ husik hela liafuan motivasaun iha momentu ne’ebá.

Jornalista : Nelson de Sousa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here