NAF realiza simpóziu, iha salaun eis World Vision, Caicoli, sabadu (16/10). Imajen TATOLI/Francisco Sony

DILI, 16 outubru 2021 (TATOLI)–Organizasaun Núkleu Ativista FRETILIN (NAF) realiza simpósiu ba membru ativista sira hodi prepara sai di’ak liután iha futuru hodi serví Estadu.

Simpósiu ne’e realiza ho tema ‘Definasaun postura ativista tuir andamentu konjuntura polítika resente’, ho ninia sub-tema ‘Definasaun pozisaun NAF no reafirmasaun nafsista’.

Prezidente NAF, Nino Aitarak. Imajen TATOLI/Francisco Sony

“Ativista la’o kuaze tinan sia resin ona no andamentu nasaun mós la’o maka’as, entaun ita presiza hadi’a ita-nia postura ne’ebé nafatin reflete ba situasaun reál, entaun iha simpósiu ne’e fó oportunidade ba ema hotu atubele ko’alia, liuliu ba membru ativista sira hosi estudante, juventude populár iha baze no ba sira ne’ebé serbisu,” Prezidente NAF, Nino Aitarak, hateten, iha salaun eis World Vision, Caicoli, sábadu ne’e.

Organizasaun ne’ebé partisipa iha simpósiu ne’e hanesan, Organizasaun Unidade Nasionál, Kalur, Asosiasaun Movimentu Maiubere oan (AMMU), Ativista Foin-sa’e Timor-Leste (AFTL), no Organizasaun Rezisténsia 001.

Tuir Nino Aitarak, estudante tenke estuda didi’ak, nune’e bele sai matenek hodi serví rai ne’e ho di’ak.

“Karik sai negosiante fa’an sasán tenke ho loloos no karik sai funsionáriu tenke servisu ho di’ak liuhosi halakon korrupsaun iha rai ida ne’e. Entaun, iha simpósiu ne’e haree situasaun sira ba oin karik iha posibilidade atu redefine, tanba NAF nia kualidade ida maka atu hanoin katak povu ne’e tenke hetan moris di’ak iha nasaun ida-ne’e,” nia akresenta.

Prezidente NAF sente orgullu ba Timor-Leste nia istória pasada, tanba ne’e nia konsidera presiza reafirma iha prezente liuhosi simpósiu, atu haree projetu iha futuru ne’ebé di’ak ba nasaun no sidadaun hotu.

“Ativista tenke lori nafatin povu hodi goja ukun-an, tanba NAF nu’udar na’in ba ahi no fatin, ita mai hosi kultura ida no lisan hun ida, ne’ebé nafatin kria ita-nia amizade kooperasaun liuhosi entendententu ita-nia lisan no kultura, atu nune’e ema hotu labele dook hosi ninia identidade hodi fó filafali definasaun kualidade Timór ne’ebé iha identidade karakterístika própriu,” nia subliña.

Pose ba membru estrutura Beleza 21

Iha ámbitu simpósiu, NAF mós fó pose ba membru Belesa hamutuk 21, ho objetivu ba oin estrutura sira bele tun ba baze hodi fó formasaun ativista polítika nian ba foin-sa’e sira.

“Ita fó pose ita-nia membru estrutura Beleza hamutuk 21, hahú hosi Koordenadora Jerál, Vise na’in-rua, ho ninia membru iha programa espesífiku, ho objetivu, ho membru ne’ebé maioria feto, bele hala’o atividade iha terrenu, fó formasaun ba ativista feto maluk no joven sira, hodi hasa’e sira-nia koñesimentu atu sai servídor di’ak hodi serví rai ida-ne’e,” nia dehan.

Koordenadora Beleza, Livania Soares de Deus. Imajen TATOLI/Francisco Sony

Iha biban hanesan, Koordenadora Beleza, Livania Soares de Deus, hateten, knaar ne’ebé ohin nia simu, ba oin sei hamutuk ho estrutura kria planu ne’ebé di’ak kona-ba formasaun ba ativista foin-sa’e sira.

“Hanesan iha Beleza, ami sei halo formasaun ba ami-nia feto maluk sira ne’ebé presiza atu hetan formasaun iha área hanesan polítika no sosiál, tanba joven mak futuru nasaun nian, ita tenke kapasita sira, nune’e sira prepara-an didi’ak atu serví rai la’o ho di’ak, ne’ebé ami sei hahú planu atividade iha Dili to’o ba munisípiu sira,” nia akresenta.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here