Ministru Prezidénsia Konsellu Ministru, Fidelis Manuel Leite Magalhães, esplika importánsia vasina ba komunidade, iha Merkadu Maliana, sábadu (16/10). Imajen TATOLI/Sérgio da Cruz

BOBONARO 16 outubru 2021 (TATOLI)–Ministru Prezidénsia Konsellu Ministru, Fidelis Manuel Leite Magalhães, enkoraja komunidade Bobonaro atu partisipa másimu iha kampaña vasina hodi aumenta imunidade iha isin kombate COVID-19.

“Inan-aman no maun alin sira ne’ebé halibur iha merkadu Maliana, vasina mak hanesan bala ba ita no kakaluk atu proteje ita hosi vírus COVID-19, tamba ne’e, ha’u husu imi atu iha konsiénsia partisipa iha programa nasionál ne’e, atu ita hotu hamutuk redús moras,” Ministru hateten komunidade iha merkadu Maliana, munisípu Bobonaro, sábadu ne’e.

Iha biban ne’e, governante ne’e apela ba  komunidade hotu iha Bobonaro, liuliu iha área rurál, atu labele fiar informasaun hoax ne’ebé espalla iha rede sosiál, tamba vasina tipu AstraZeneca ne’ebé Governu deside oferese ba populasaun tomak seguru no laiha impaktu negativu ba ema-nia saúde.

Ministru esplika importánsia vasina iha ámbitu pandemia no dehan molok nasaun dezenvolvidu sira importa vasina AstraZeneca mai Timor-Leste, péritu sira halo ona teste oioin no hetan rekomendasaun hosi Organizasaun Mundiál Saúde (OMS) katak vasina ne’e di’ak.

“Mai ita hotu hamutuk simu vasina, atu ita-nia atividade negósiu, eskola no aktividade kulturál bele la’o normál,” nia akresenta.

Membru ezekutivu ne’e dezafia komunidade sira atu voluntáriamente hakbesik-an ba sentru vasinasaun, tamba daudaun ne’e Amu Papa no Líder nasionál sira hanesan Xanana Gusmão, Lú olo, Taur Matan Ruak, Marí Alkatiri, Ramos Horta no Lere Anan Timur, inklui membru Governu no autoridade munisípal sira simu hotu ona vasina kompleta.

“Komforme informasaun hosi Vatikanu katak, ita-nia Santu Padre iha duni planu atu vizita mai ita-nia rai, maibé ita-nia partisipasaun ba vasina tenke to’o 80%, se lae Amu Papa la mai tanba vizita ne’e halibur ema barak,” nia dehan.

Notísia relevante: Resprezentante Vatikanu: “Vizita Papa Francisco Mai Timor-Leste La Kansela Maibé Adia”

Tanba ne’e, atu alkansa persetajen vasinasaun atinje tuir alvu, Governu hakarak funsionáriu públiku iha dever no obrigasaun atu simu vasina kompletu, nune’e bele sai ezemplár ba komunidade ne’ebé tauk simu vasina.

Abitante apresia ho vizita Ministru

Iha fatin hanesan Abitante, Rosantina da Costa, apresia ho prezensa Ministru, ne’ebé sira bele rona direta informasaun kredível kona-ba importánsia vasina no iha momentu ne’e kedan, nia deside simu vasina doze dahuluk.

“Ohin ha’u simu ona vasina, sente liman mak moras oituan, maibé ha’u-nia isin lolon tomak normál hela hanesan baibain, ha’u sente aimoruk ne’e di’ak duni ba ita-nia isin,” nia fó sasin.

Abitante ne’e haktuir, antes ne’e, nia deside la simu vasina tanba hetan influénsia maka’as hosi viziñu katak vasina bele oho ema, maibé realidade nia sente vasina di’ak tebes atu luta hasoru COVID-19.

“Ha’u-nia kaben seidauk simu, ne’ebé ba uma ha’u sei hateten ba nia atu mai simu vasina atu ita bele la’o bá-mai livre no moras la kona,” nia akresenta.

Tuir observasaun Agência TATOLI iha merkadu Maliana nota katak, komunidade no negosiante ne’ebé halo atividade fa’an no sosa, barak mak la uza máskara no fasilidade sanitária iha merkadu ne’e ho kondisaun a’at no laiha bee-moos.

Tuir dadus hosi Ministériu Saúde iha loron 15 outubru, rejista populasaun munisípiu Bobonaro ho idade 18 ba leten ne’ebé simu ona vasina doze dahuluk hamutuk 28.389 (50%) no vasina doze daruak hamutuk 15.522 (27,4%), ne’ebé hosi rezultadu ne’e hatudu katak munisípiu Bobonaro okupa terseiru lugar numeru kiik liu hosi munisípiu hotu.

Nune’e iha loron hanesan, iha nível territóriu tomak, rejista ona ema 504.194 (66,8%) mak simu ona vasina doze dahuluk no ema 322.439 (42,7%) mak simu ona vasina doze daruak, ho totál kobertura 826.634.

Jornalista : Sérgio da Cruz

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here