Bispu Dioseze Maliana, Don Norberto do Amaral. Imajen TATOLI/Sérgio da Cruz

BOBONARO, 16 outubu 2021 (TATOLI)—Bispu Dioseze Maliana, Don Norberto do Amaral, enkoraja sarani, liuliu iha munisípiu Bobonaro atu partisipa iha programa nasionál kampaña vasinasaun hodi aumenta imunidade hasoru COVID-19.

“Hau nia mensajen ba sarani sira hotu, mai ita hotu simu vasina, atu tama iha situasaun hanesan uluk, tamba tuir igreja, vasina ne’e hanesan ita halo karidade ba ema seluk no karidade ba ita-nia an rasik hodi moris nu’udar sarani. Karidade ne’e importante, tuir São Paulo, karidade a’as liu buat hotu,” Bispu Dioseze Maliana, informa ba Agência TATOLI, iha iha Kámara Eklediástika Dioseze Maliana, sábadu ne’e.

Notísia relevante: Autoridade Bobonaro esforsu hasa’e kobertura vasinasaun

Tuir Don Norberto, komunidade ne’ebé lakoi partisipa vasina, bele fó ameasa ba vida, tamba peste COVID-19 realidade halo lakon ema-nia vida iha país barak inklui Timor-Leste.

Tamba ne’e, Amu Bispu konsensializa sarani hotu atu voluntáriamente hakbesik-an ba sentru vasinasaun ne’ebé estabelesidu iha suku no aldeia, tamba vasina mak únika solusaun atu mitiga no elimina kontajia pandemia.

“Iha situasaun hanesan ne’e, maski ita-nia nasaun demokrátiku, povu hotu iha liberdade konsiénsia, maibé haree ba realidade obriga ita katak, di’ak liu simu vasina atubele minimiza moras ida-ne’e atu bele halo atividade hotu ho di’ak, tanba se ita lakoi mak tenke aplika serka sanitária no konfinamentu domisiliáriu beibeik,” Don Norberto fó hanoin.

Don Norberto husu sarani labele influénsia ho informasaun hoax

Biban ne’e, Líder másimu Dioseze Maliana apela ba sarani iha Timór laran tomak, atu labele influénsia ho informasaun hoax ka lia falsu ne’ebé ema lansa iha rede sosiál, tamba individuu ka grupu ne’ebé espalla informasaun iha interese partidária no koko atu hamonu dignidade Estadu no Governu.

Aleinde ne’e, Líder relijiozu konsidera mídia sira iha papél importante atu eduka públiku iha ámbitu COVID-19 invade Timor-Leste, nune’e bele halo loos informasaun boatu sira.

“Jornalista labele hakerek fali ne’ebé halo ema tauk, maibé tenki buka hatene buat ne’ebé loloos no faktu atubele sai ema ne’ebé profesionál iha vida jornalizmu, tamba imi-nia produtu mak determina ema fiar ou lae,” Amu Bispu apela ba jornalista sira.

Don Norberto husu mídia estatál no privadu, hosi plataforma online, imprime no eletróniku, bainhira divulga informasaun tenki hili fonte informasaun kredível hosi ofisiál Estadu, nune’e bele konvense komunidade hodi  kontribui hasa’e partisipasaun kobertura vasinasaun iha Timor-Leste.

Amu Bispu husu mós ba sarani sira atu mantein protokolu saúde, hanesan uza máskara bainhira sai ba fatin públiku, fase liman ho sabaun no halo distansiamentu fíziku hosi ema ida ho ema seluk.

Tuir dadus hosi Ministériu Saúde iha loron 15 outubru, rejista populasaun munisípiu Bobonaro ho idade 18 ba leten ne’ebé simu ona vasina doze dahuluk hamutuk 28.389 (50%) no vasina doze daruak hamutuk 15.522 (27,4%).

Nune’e iha loron hanesan, iha nível territóriu tomak, rejista ona ema 504.194 (66,8%) mak simu ona vasina doze dahuluk no ema 322.439 (42,7%) mak simu ona vasina doze daruak, ho totál kobertura 826.634.

Jornalista : Sérgio da Cruz

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here